‘O ffraceto

Io levo ‘a miezo ‘o ffraceto

e vaco annanze,

ma ‘e dulore ‘e panze

ca me faie patì

nun ‘e capisco,

ca songo fatte tuie.

M’allora io chi songo

si te serogne

tutt’’e vvote

c’haie bisogno

e nun me sento ‘e dicere

maie grazie ?

Ca simme pate e figlio

chesto ‘o saccio,

ma sulo quanno dongo,

quanno caccio.

Quanno me sbatte

‘a porta ‘nfaccià

chi so ? Nu scemo

ca nun sape fa ‘o pate ?

Ca nun t’ha dato maie

nu strillo ‘ncapa

e ancora te vo’ bbene?

Me faie venì na pena

ca nun supporto cchiù.

Me sceto ogne matina

e dico: - Forse cagna,

ma so’ passate mise

e chesta lagna

se fa sempe cchiù tosta.

Si ‘un ce capimmo

ognuno p’’a via propria

e quanno ce ncuntrammo

songo nu furastiero

ca ogne tanto passa

pur’io pe stu quartiere.

E nun fa comme a chillo

ca dice: - Io te canosco

pe se fa dà qualcosa.

Io vengo a n’atu bosco

nun tengo ‘a capa fresca

fino ca nun m’abbosco.

Gioacchino Ruocco

Ostia Lido   13/02/2013

Inserita nella raccolta “ Tipi…ma guarda che tipi”

Ormaie…

Ormaie ‘o tiempo sta cagnanno ciorta.

Te suse e chiove, te vaie a cuccà e chiove

e che m’apiette ‘e nnove

ormaie nun è pussibile.

Scenne nu lavarone ‘a copp’a sta muntagna

ca sta purtanno ‘o munno a parte ‘e vascio.

Tengo na tossa ca pare na rancascia,

na debulezza tale dint’’e coscie

ch’è meglio ca me stongo dint’’o lietto

me faccio na surata e levo ‘a cuollo

tutt’a stanchezza  e ‘o muollo ca me sente.

nun m’aspetta ca mo i’ nun m''a sente.

Levete ‘a miez’’a via ch’è maletiempo.

‘O bbene ca te voglio si ‘un ‘o siento

t’è passato vicino dint’’o viento

ca nun asciutta ‘e panne, ma s’’e porta.

Chi ha fatto na culata quann’a stenno ?

Sulo int’o titto addò arrecietto ‘e ccose

ca songo ‘e troppo ormaie dint’a sta casa

c’appena trase pare nu magazzino.

Sott’a campana ‘e vrito io t’aspetto

c’addò me miette miette so’ cuntento.

Dint’a chell’ata c’è miso nu presepio

c’’a dint’’a mia veco quase a stiento.

‘O lietto appriparato cu ‘e lenzole

ca t’’è lassate mammete murenne

pare nu monumento tant’è gruosso

ca nu suspire se perde dint’a ll’osse.

Vedimmece dimane,

quanno s’acconcia ‘o tiempo

pò ddarse ca sto bbuono,

c’’a freve m’è passata,

c’’a villa ‘un s’è allagata.

Quanno accummencia ‘o tiempo

nun ssaie quanno ‘a fenesce.

Meglio st’arriparate,

meglio ca nun s’aesce.

Stu fatto me rencresce

ma, oj ne, che ce vuò ffà ?

Ormaie tengo n’età.

Gioacchino Ruocco

Ostia Lido             28/01/2013

Inserita nella raccolta " Tipi....... "

I’ quanno more…

Uomo di  Similaun

I’ quanno more m’aggio fa nu suonno

c’accummencia ogge e dura all’infinito

ca primmo ‘e movere nu dito

adda passà tutta l’eternità.

Ca si qualcuno vene pe qualcosa

‘nn ’o voglio sentì manco

pecchè me sento ancora tanto stanco

ca me voglio primma arrepusà nu poco,

primme ‘e me piglià qualc’ata rogna

‘ncopp’e spalla. E chi se ‘ngrogna

se 'ngrogna, torne dimane,

quanno sto cchiù commedo.

E nun me dà ‘e penziere

ca fino a iere me n’ha date tante.

E a chi nun sape leggere spiegale

ca io riposo in pace pe l’eternità,

ca songo muorto, nun pozzo cchiù fà niente

e ca p’’e grazie ce so’  rimaste ‘e sante.

Cu nu lumino avanze e sta sicuro.

Nun me venite a chiedere vigliette

ca nun è juorno cchiù ‘e vintisette.

Quann’io so’ muorto

me voglio fa nu suonno chino chino

ca me voglio scetà cu n’aria sapurita

ca ‘a vita ‘e ogge manco é nu ricordo.

Piglia n’appunto primma ca te scuordo

e che te faie na mez’ora ‘e chianto.

Falla fenuta, non essere scuccianta!

Gioacchino Ruocco

Ostia Lido             20/12/2012

Inserita nella raccolta “Tipi….guarda che tipi”

Ll’acquasantiera…

Sant'Anastasia - Verona

Ll’acquasantiera nun è chiena ‘e grazie

si tu te ‘nfunn’’a mano e faie capricce.

Ll’uocchie tuoie s’appicciano‘e suspire

fino ca nun truove a chi 'ncuità.

E aiere capitaie proprie a me

dint’’o purtone, ‘int’a na zona ‘e scuro.

T’avvicinaste e me piglaste ‘e pietto

mettennemo cu ‘ spalle contro ‘o muro.

I’ te vulevo a tantu tiempo già

ma nun songo uno ca se fa acchiappà,

ma dint’’o stritto nun te resistette

e me piglaie ‘o ddoce che n’ascette.

E ogne vvote ca te veco mò

comme a nu scemo guardo suspiranno,

comme si m’aspettasse n’ata vota

ca te pigliasse n’ata cunfirenzia.

Ostia Lido       31/10/2012

Inserita nella raccolta “ TIPI “

di Gioacchino Ruocco

in via di pubblicazione su questo blog

Essa fa ‘a jatta…

Essa fa ‘a jatta e ‘o sorece acchiappo io.

Sempe distratta sempe c’avemmarie

‘e nu russario ca nun tene fine.

Accummence matina matina

e fino ‘a ssera sta sempe a rusecà.

Si tene sete sbuccia nu mandarino.

‘E scorze nun fa ate c’astipà.

‘E mette dint’’o zucchero pe vierno

pe dolce c’ogne tanto mette e fa

o nu rusolio ca tene ‘int’’e butteglie

ca tenene n’età e s’’e sta attiente,

'e ricevette in eredità.

‘A nonna soia era ‘e bbona famiglia,

ma ‘a mamma se spusaie, che parapiglia,

cu chi vuleva e no chi l’attuccava.

Nascettene tre o quatte figlie,

nisciune ‘e chiste ca campaie nu journe.

Sul’essa ci ‘a facette ‘int’’a vammace.

E mò si si capace ca te sente.

Tene na capa tosta e ogne mumento

te chiamma e te dà ordini a bacchetta.

T’aspetta duie minute e quanno aspetta

nu poco ‘e cchiù t’ammolla nu turmiento

ca te leva ‘a pacienzia ‘a dint’’e mmane.

Leva ‘a felinia pure ‘a dint’’e buche,

ma nun è essa ca s’’o mette a fà.

Essa cumanna  e si 'nn'è fatte bbuono

te fa na capa tanta che t’ammosce,

te vene nu nervuso, nu male dint’’e ccosce

ca ll’atu juorno m’è fatto na paposcia.

Na cosa tene ‘e bbuono, me vo bbene,

me dà ‘e turnìmiente sulo si sta ‘int’’e ppene

s’astregna a me ‘e nun me vo’ lassà.

Quann’esco nu minuto già me chiamma

dicenno can un se sente bbona

c’’a ccorrere me fanno male ‘e gamme.

Ma si me sente male overamente

me porte ‘e mmedicine e me sta attiento:

pigliete chesto e pigliete chest'ato.

 Me sta vicino e nu me lassa maie

e se respera ca nun sia maie

ca pe nu giro ‘e cape ‘a lasse sola, 

senza n’anema ‘e Ddio c’’a sta vicino

ca quann’ave bisogno haddà scattà

se fa sentì a tutte 'int''o palazzo.

Ostia Lido       03/10/2012      ore 05,00

Inserita nella raccolta

TIPI  di Gioacchino Ruocco

Che tengo ‘a perdere ? inserita nella raccolta "TIPI"

Che tengo ‘a perdere

si ogge me va storta?

I’ tiro fore ’a sporta

cu chello che m’avanza

e quanno è chiena ‘a panza

che vuò penzà ?

Iusto pe fantasia.

pe fa vedè a ll’ate

ca dico pure ‘a mia,

tengo pur’io n’idea

‘e chello ch’è sta vita.

Si faccio ‘a parte ‘e tuosto

nun è c’’o faccio apposta.

‘O faccio pe fa ridere

sti quatte mosche

ca me stanno appriesso.

Chille ca me sanno

sanno chello ca dico

e ancora qualche amico

pur’io, pur’io ‘o tengo.

Io campo a bbona ‘e Ddio,

m’avasta poco

nu piezzo ‘e pane,

na sfoglia ‘e na cepolla

e quanno ll’acqua volla

iusto duie file ‘e pasta

pecchè ‘o poco avasta

e ‘o troppo  te va a mmale.

I’ dint’a sporta tengo

tanto  bbene ‘e Dio

ca pozzo priparà

na tavola

pe nati cciente e ciente

pe tutte chille

ca stanno appriesso a loro

pe chi me vene a dicere

ca nun po’ cchiù campà

ch''e tiempe so' cagnate

e  intanto quanno bussa

cuntinua a rusecà.

Gioacchino Ruocco

27/08/2012 - Ostia lido

E’ inserita nella raccolta “Tipi”