Ce stanno cose …

Ce stanno cose ca

se fanno e basta

comme a vuttà ‘a pasta

quanno ll’acqua volle,

darte nu vaso

quanno t’acchiappo a tiro

e si ‘o core se scunfiro

passà ‘nnanze

pe me fa passà

‘o male ‘e panze

ca me fa niro niro

quanno te penzo troppo.

Na preta ‘ncoppa

‘nn è facile

quanno vuò ragione,

quanno ‘a ragione è ‘a toia,

quanno ‘e tutte e doie

nun te n’appartene meza.

Piglià na pillola

quanno ‘o male ‘e diente

nun vo’ passà

e nun ce sta cchiù niente

ca te fa  ragiunà,

restà indifferente.

Ce stanno cosa ca

nun può fà finta

‘e nun vedè.

Ce staie cu ‘e piede a dinto

e nun te va ‘e cadè.

Ce stanno cosa ca

addoreno cchiù d’’e rose

ca te sturdiscene.

te leveno ‘e penziere,

comm’a iere

ca t’acchiappaie ‘int’’o stritto

‘e me pigliaste ‘e pietto

e nun putetto dicere

ca nun era ‘o mumento

si ‘o vulevo ‘a tanto.

Nun me sentetto

comme a nu perdente

e appriesso a te

me ne venetto

comme a nu guaglinciello

speruto ‘a tantu tiempo

‘e sta cu tte nu poco

astrinto astrinto

comme dint’’o fuoco.

Gioacchino Ruocco

Ostia lido     23/12/2012             ore          12.30

Inserita nella raccolta “Suspire ‘e miezejuorne”

Anneto...

Ogge pe vedè ‘o cielo

l’anneto nun basta.

Manc’’a fatica

e manca pure ‘a pasta.

Na capa ‘e pane

senza niente a dinto

pare ch’è fatto finta

‘e campà pure ogge.

Fore a sta logge

ce stanno cchiù penziere

ca piante ‘e addore.

L’ammore se ne va

cu tutto stu dulore

ca ce stanno a ddà.

Nuie nun vulimme chiagnere

vulimme fatecà.

Ca si tenesse ‘o ppane

i’ me ne stesse a casa

facesse quatte passa

p’’a villa a guardà ‘o mare.

E invece songo mise

ca so’ nu cristo ‘mpiso

cu nu penziero amaro

ca nun me lassa stà.

Dimane ‘e che campo

che ddongo po’ a magnà

a chiste figlie mie

ca so’ aneme ‘e Ddio

comme so’ ‘e figlie ‘e ll’ate.

Che joca a fuggiata ?

E quanno ‘a piglio

si nun l’aggio pigliata

cu ‘a fatica fino a mò.

Saglienno ‘ncopp’a ll’anneto

pareva ‘e saglì ‘ncielo,

ma mò cu ‘e piere ‘nterra

so sule sti pensiere

ca sagliano int’’o cielo

cercanno chillu sole

ch’’e vote dà speranza.

Si murmelea ‘a panza

le conte qualche chiacchere

e nu bicchiere d’acqua

c’’a funtanella votta.

Ma ‘o tiempo ca ripassa

pare ca me sfotte

'nmiez’’a stu votta votta

c’ormaie nun me dà pace.

Si sule fosse capace…

Nun ce pozzo penzà

ce stanno a casa ‘e figlie

pe cchesto ‘un se pò fa.

Ostia Lido     06/10/2012      ore 06,00

Inserita nella raccolta

Suspire 'e miezojuorno di Ruocco Gioacchino