Chest’è Castiellammare

Immagini da Stabia Channel

Chest’è Castiellammare!

Quanno te cucche a sera

te miette dint’’o lietto

ma quanno po’ te scite

te truove a ‘mmiez’’o  mmare

senza cchiù ‘e quatte rote,

senza cchiù 'a lampara,

senza truvà  cchiù ‘a via

manco ‘e casa toia.

Sicuro ‘e sta cuieto

siente ‘e girà p’’a casa

mille furmica c’ a stiento

te lasciano ‘o panaro

p’acala a bbascio ‘e sorde

si no qualcuno sparo.

E addò vaie 

ca si rimasto a ‘ncristo ?

I’ che nuttate triste

e che ghjurnate amare.

Chisto è Castiellammare

‘a qualche tiempo a mò.

E’ bello ‘o mare e ‘o monte

ma cu stu ffuoco ‘nfronte

ca sta brucianno tutto

me sto vestenno a llutto

quase tuu’’e juorne .

‘A villa ? E chi t’’a dà ?

Ogne ghiurnata è mille

e primma ch’essa passa

te fanno nu salasso

ca nun te lassa allerto

Facenno ‘o pare e spara

c’aggia cagnà paese ?

Ma po’ cu troppa pace

nun saccio cchiù campà.

So tutte triatante

a stu paese mio.

Ognuno tene ‘a parte

e ‘a recita  a suggetto.
Ma hanno perzo 'o scuorno.

Nun sanno cchiù che r’è !

Basta nu chitammuorto

p'addeventarne ‘o rre.

Gioacchino Ruocco

09.09.017 Ostia Lido

Si bastasse…

Errico Gaeta - Marina di Pozzano 

Si bastasse na chiagnuta

pe turnà bbuono ‘e salute

chiagnesse tutt’’e juorne

pe mme e pure pe ll’ate.

Na lacreme te fa

cchiù gruosso ‘o core.

So’ amare,

ma doce comm’ammore.

Si pe sta bbuono

bastasse na jurnata a scialacore

me desse a pazza gioia

pe te vedè cuntenta,

cuieta, calma

Senze a nu penziero

pecchè quanno ne tiene

so’ sempe amare,

ca nun lasceno tranquille

comme ‘o mare ca sbatte

e nu staie maie cuieta.

Isso ‘o fa pe mestiere.

Fa n’onda appriessa a n’ata

e nun so dispiacere.

ma storie ‘e marenare

ca veneno a luntano,

rumanze

c’’o mare daie e daie

‘a tantu tiempe  conte

e nun s’’e scorde maie.

T’arricurdasse ‘e iere

comme a na gioia

ca quanno arriva

tiro nu suspiro

ca ‘o munno nun fernesce

primma ca na bella jurnata aesce,

c’hanno raccontato

tanta storie

e sule storie ca ce fanno male.

Ognuno po’ penzà chella ca vò

ma nun ce sta nisciuno

ca me po’ dicere na storia

ca nu stà ne ncielo ‘o nterra.

‘A guerra è guerrà

e si ‘a vonno fa

e pe ce guadagnà

sempe qualcosa,

ma ‘a panza è panza

e quanno s’e dignuta

nun chiede ll’atu ppane.

Si nun se fa dimane

e ll’ora pe mangià.

Nu piezz’’e pane

e na sfoglia ‘e cepolla

e attuorno a te se fa

ancora ‘a folla

pe mangià assieme

comme atant’anne fa.

Gioacchino Ruocco

Ostia Lido       07/03/2013

Inserita nella raccolta “Suspire ‘e miezojuorno”