Comme te chiamme…..

Comme te chiamme…..

 

Comme te chiamme tu ?

Vulesse da 'o nomme a nu ricordo,

'a chella faccia ca nun vedette cchiù

'a quanno cagnanno casa

nun riturnaie  a 'o vico Surrentino.

 

Era comme a na palomma

ca scetannese matina

passava 'int'' ciardino

areto a casa

e se purtava appriesso

l'addore 'e mandarino, d''e limune

ca se spanneva cu essa 'int'a ll'aria.

 

Cchiù tiempo passa

e chhiù me dà turmiento

e ‘o viento nun m’aiuta

quanno pe nu saluto

me porta ‘e stesse addore.

 

Sarrà ch’’e tiempo n’è passato tanto

e ca criscenno

cagneno ‘e facce,

cagneno ‘e sentimente,

ca primmo eremo

aneme ‘nnucente

e mò chi tene  ancora

voglia ‘a arricurdà…

 

Si tu me viene a ddì:

-ma a che te serve,

che te rispongo ?

 

Forse nun so’ cuntento

‘e comme va,

comme m’e ghiuto…

Forse sta vita

put’eva esse…

 

Ma si nun è stata

e int’a stu vico

nun ce si cchiù turnato

pecchè ce tuorne mò

c’’a vita t’ha cagnato

ca scrive e scrive

e nun truove pace ?

 

‘E vvote n’ombra pare

ca po’ cagna na vita

pure all’urdemo mumento…

M’’o sento, nun m’’o sento che ne saccio ?

ma stu ricordo io m’’o trovo nnante

quase ogne notte, quase ogne ghiuorno

 

e quanno ‘e vvote me piglia p’’a mano

nun saccio manco dì addo me porta…

Forse ‘int’o ciardino areto ‘a casa

forse p’’o Santo, forse p’’o capiazzo

forse pe na via fore mano

pe me dà nu vaso

ca nun me dette maie….

forse pecchè pur’essa

s’arricorda ‘e me

e me vò dà nu nomme

Ma chi ‘o sa

si dint’’o suonno è ‘o stesso….

 

Gioacchino Ruocco

 

Ostia Lido     31.03.2021

 

gioacchinoruocco@libero.it