quanno sento ch'è stanco

M''o chiagne stu paese ogne tanto.

Me sento male sulo a penzà 'e chiacchiere

ca tanta ggente fà pe nun fà niente

pe lascià 'e ccose pe cuntinuà a rubà.

Nu magna magna ca nun s'era visto

a mano a Giesù Cristo.

Liggitele 'e giurnale

si no pecchè 'e scriveno.

Veleno tutt''e juorno, mariuligie,

gente c'accire e fanno 'a voce grossa.

E chille ca pigliano 'e valigie

e se ne vanno 'a parte 'e fore.

Ggente ca strille, allucca

e po' t'accuorge ca teneno 'a parrucca

pe nun se fà canoscere

e tutt''e juorne ammosceno

facenne nu lamiento

c'avimme fà qualcosa

ma po' è sultanto 'o viento

ca se lamenta e va

cercanno 'e fà nu poco 'e pulizzia

ca 'e munnezze ormaie ce ne sta tanta

ca dinto 'o core 'a sento

pure si sto luntano.

Santù Catiè che faje ?

Faje finta 'e nun vedè ?

Pigliasse 'a mitria 

e le spaccasso a capa

a chille cu 'o grasso tanto dint''o core.

Pure 'o cchiù bbuono ormaje é malamente

si fa l'indifferente e se ne fotte

tanto già l'ha rignuto 'a votta,

ormaje s'è 'mbriacato.

'A carta c'ha jucato é chella c'ha vinciuto

e quanno sento ch'è stanco

ce fotte e se ne và.

G. Ruocco