K2

Castellammare di Stabia - Via Giuseppe Bonito 2

K2

Quanno me vene ‘a voglia ‘e nu gelato

i’ tengo a ‘nnaz’a ll’uocchie  ‘o K2

e cu sta chiocca me metto a via nnante

ma nun m’avasta ca resta nu penziero.

Addò stò ‘e casa

songo belle e fatte

ch’’e truove a tutte parte
tutto ll'anno.

Ma comme sarrà fatto

ca me ne parle sempe,

m’ha ditto na perzona ca me sento

ca me lamento

ma nun me cunpatisce.

Ma tu’n ‘o ssaie che r’è ‘o Kappa due ?

Si dico è na muntagna me capisce ?

E’ tanta ‘e chella rrobba

ca mange mange mange

e nun te stanche maie

e ‘a lengua ‘n addeventa nu ghiacciolo,

ma s’arrecrea  cu ‘a crema

cu ‘a nocciola

bella croccanta

ca scrocchia sott’e mola.

’A murzecata appriesso

cu ‘a cassata

te fa ‘sci pazzo

ca ‘e piezze ‘e ciuculata

t’’e sceruppe

e 'a 'ddora d’’a sciarappa

te cunzola

ca na parola ppoco

e doie so’ tutt’’o munno.

Si pienze ‘e jì’ a ffunno

ce sta ancora ‘o cono

c'‘a mmuorzeco

t’’o faie pecchè ‘o siente

ancora tuoste,

rusecariello

e cu na faccia tosta

rituorne arreto

e te n’accatto n’ato

a faccia ‘e cchi

 te guarda scunfirato
ca isso 'n 'o pò fà.

Gioacchino Ruocco

Ostia lido     01.04.019

A Pierluigi Fiorenza