All’Acqua d’’a Madonna da "Suspire 'e miezo juorno"

Cmare di Stabia - Chiosco privato per l'attingimento di Acqua della madonna,
Acidula e Acetosella

All’Acqua d’’a Madonna t’hanno vista

‘nzieme a Peppeniello ‘o farmacista.

Redive ogne vota c’’o scemetto

dicevo quatte stroppele ‘e cuncetto.

‘O fatto è sempe ‘o stesso. Punto e basta.

Chillo è n’amico, mico è na rapesta.

Chesto, ‘o saccio, è ‘a giustifica ca puorto,

ma quanno cammenave dint’’o puorto

stive appoggiata a isso chi sa comme.

Forse s’era sgunfiata n’ata gomma,

comme a ll’atriere quanno ‘ncopp’o corso

chiammaste a chill’ato p’’o soccorso?

Embè ce vò, ca tutt’e juorne serve

quaccheduno ca te po’ dà na mano

specie quann’io stongo luntano

senza penzà ca  ‘o fatto me dà ‘e nierve

pe tutte ‘e chiacchiere ‘e tutta ‘a gente

ca tenimmo attuorno e d’‘e pariente

ca pare ca nun tenene maie niente

‘a fa si nun penzà ‘e fatte nuosto.

Però me pare ca tu ‘o faie apposta

si una ‘e chelli cape toste

ca vonno vencere pure si fanno

danno, tanto che faie ‘e male?

E intanto ogne amico ca te vede

me ferma pe me fa na capa tanta.

‘O cchiù scemo s’è permiso ‘e dicere

Giggi, tu si nu santo e ‘o paraviso

te sta aspettanno pecchè ce manco

e io cu n’aria stanca ‘o manno addò

se po’ mannà uno ca sfotte.

Ce manco sulamente ‘o votta votta

‘e tutte chille ca vonno di qualcosa.

Si pure sanno ‘o male ca me fanno

pecchè hanno paure ca si nun stongo

cu ‘e spalle contro ‘o mure, c’amice

songo? Ca fanno finta ‘e niente?

E io aggio voglia ‘e dicere c’’o saccio

‘o cchiù sincere m’ha ditte ‘nfaccia ‘nfaccia

Giggì, è sempe tarde quanno tu na caccie….

Chesta te po’ fa nu brutto scherzo!

E ‘a nu mumento a n’ato te truovo

sulo e abbandonato nun sulo ‘a essa

ma pure ‘a chillo ca t’è fatto fesso.

Comme si io e te fossemo niente ?

Ma che ne sanno ‘a quanno stamme ‘nziemo ?

‘E quanno tu te spigne ‘mbracci’ a me

Comme si fusse nu cunfietto riccio.

Quanno s’appiccio ‘o core che passione!

Quanno te guardo si comme a na canzone,

quanno te piglio ‘a mano e te ne viene

e ce ne jammo addò sapimmo nuie.

Ma che ne sanno ll’ate ‘e sta passione

Ca io e te simmo ‘e na pasta sola

Ca nun è bbona sule pe fa ‘a pizza

Ca basta na guardata e na parola

Pe ce capì e jessere sicure

c''a porta è chiusa senza c’’a mascatura

fa quatte gire e miette ‘o pale ‘e fierro

ogne vota ca esco e lascio ‘o capo

sultanto mmano a te, c’arape a chi

saluta e se ne va comm’è venuto.

Tante ‘o ccchiù bravo ‘e lluommene è curnuto

cu na guagliona bella comme ‘a te.

                              Chisti raggiunamento ‘e fanno chille

      ca nun songo uommene, ma figli’ ‘e sfaccimme,

      so chill’amice can un te danno pace

      ca te danno a capì ca so’ capace

      ‘e pognere e te lassà ‘o mierco

      Pe te fa capì ca quanno parleno

      songo perzone ca conteno ‘e parole

      e stanno attiente e ‘nturzature ‘e mole.

       

      Ostia lido, 16 giugno 2012-06-16 ore 07.00

Inserita nella raccolta:    “Suspire ‘e miezojuorno”

autore:                            Gioacchino Ruocco

pubblicata da: http://ruoccotribu.blogspot.com/

Chioschi nel porto