Facesse 'na culata…

Facesse 'na culata e ascesse 'o sole

pure si ‘o pataterne ‘o spanno addò

‘e panne stise troveno cchiù cielo

nu cielo apierto e ‘o viento pe na refola.

Si ‘a vita fosse ‘a stessa a tutte parte

che bisogno ce fosse ‘e mbara n’arte

E assettarse cu nu pantesine nnanze

pe mettere nu chiove, na furmella.

Me fanne male ‘e vvote ‘e cervelle

e gire e avota pe truvà ‘a ragiona

e ne truvasse almeno una bbona

pe n’arrecria, pe na passatella ?

Quanno ‘o penziero addeventa cchiù fforte

nun me rassegna a ll’idea d’’a morte

Me pare na quisquiglia ma è trementa

penzà che songhe muorte tanta ggente.

Pe fa che ccose po’, nun ‘o capisco.

Ce stanno tanta cose pe nu sfizio

ma nun ce n’è una ca me fa capace

pe darme ogne tanto n’ombre ‘e pace.

Quanno sarrà ‘o mumento faccio ‘o stesso

ca facette chill’ate ca screveva,

ca nun curreva c’’o pede ca teneva,

ma chianu chiano sagliette p’Antignano

Si no i’ me ne vaco p’’a Saletta

addò ll’ombra ‘e n’albero m’aspetta

pe me fa nu becchieriello e ‘a capa ‘e pane

accompagnata ‘a qualche mulignana.

Chesta è l’idea e chi ne tene n’ata

ca m’’a cuntasse pe sentì che penza.

Comme fernesce ‘a vita è n’indecenza,

qualche cungegno se sarrà nceppato.

Si nun screvesse, oj né, chesti ppoesie

m’’o spiegghe tu che fosse ‘a vita mia ?

Si nun tenesse ‘a cannarizzia ‘e vase

sta vita, oj né, me dice che ce trase ?

E menu male ca t’aggia canisciuta

si no fosse na vita appecundruta

e d’’o sparagno che n’avesse fatto

quanno me basta n’uovo ‘int’’o piatto ?

Gioacchino Ruocco

Ostia Lido         15/04/2013

Inserita nella raccolta “Traduzioni dal greco”