Senza lumine ‘nnanze…

Senza lumine ‘nnanze…

Io quanno tengo ‘e piere dint’’o stritto

me fanno tanto male cammenanno

ca quase quase me vene l’affanno.

Cammino stuorto, cammino arremmerianno

Na cammenata ca me porta  annanze

p’arremmerià p’’a panza qualche cosa,

guardarme attuorno e avè n’idea nova

pe m’apparà quatt’ove e ‘o poco ‘e pane.

Cammino stuorto cercannemo n’appoggio,

guardo ‘o rilorgio p’’o tiempo ca ce manca.

N’appuntamento è na cosa seria.

Tutto te può scurdà fuorche c’’a gente

te sta aspettanno quase puntualmente

pe na speranza nova ‘e sentimento

e arriva puntuale appuntamento

se mete mmoto primme ‘e na semmana.

Si fosse santo m’acceresse sempe

pe fa na grazia a chillo ca m’’a cerca.

Comme se po’ lascià senza presente

uno ca ‘n è tenuto maie niente

e penza ca sì ll’unico tra ‘e sante

ca cerca ‘e accuntentà a tutte quante

cu nu penziero doce, na cusarella

‘e niente o ‘e solde pe na sfugliatella.

Cammino svelto e ‘o callo ‘ncopp’‘o dito

piccerillo pare na capa all’erta.

Sempe ‘e ponta me vene incontro

quanno ‘o tiempo è brutto

ca si ‘un m’assetto songo cchiù distrutto

‘e uno ch’è fernuto sott’’o tramme.

Passe nu guaglione ca me dice:

Ma ve sentite buono. Comme jamme ?

Comme aggia jì ? Mò ca passa ‘o tramme

ce saglio ‘ncoppo e vaco addò aggia jì.

ma che dicite ‘o zì, ma quale tramme.

nun ce stanno cchiù ca so’ tant’anne.

Venite nzieme a me ca v’accumpagne.

Nu piezzo ‘e strate assieme nun fa male

Io songo Giuvanniello ‘o figlio ‘e Peppe,

e vuie site Nicola ‘o figlio ‘e Antonio.

‘A primma grazia ca m’avite fà

è chella ‘e v’accatta na scarpa larga

c’’o pere ce ciacea e se ne scordo

d’’o callo e a ‘mpigna ca l’hanno stritto tanto.

Sembrate nu guaglione ‘e quinnicianne,

ma quale nonno mio !?  Tenite ‘a faccia

‘e n’ommo accuietato ca campa e campa,

ma campa pe ll’ate e fa ‘e grazie

comme a san Gennaro o ll’ati sante,

senza lumine però appicciate nnanze..

Primma c’’a gente avanza na richiesta

vuie l’appicciate ‘o core ‘e fanno festa.

Nu pare ‘e scarpe è ‘a grazia ca ve chiedo

ca l’aggia arrialà a nu signore

ca penza sempe ll’ate e ‘un tene core

‘e penzà ‘e piere suie na vota sola.

Gioacchino Ruocco    

Ostia Lido                       25.11.016