Salita piazza grande

                                        Quanno se ne care,

quanno se sgarrupa

ce vò tanta pacienza

p’accuncià

                                           o chella cuscienza

’e chi s’attacca ‘e prete

e nun ‘e vò lascià

pe nun cagnà

quanno ormie è juta.

Ce faccio caso

o nun ce faccio caso

è chesta ‘a casa mia

‘o terramoto, ‘o treno

ormaie nun sento cchiù

ne uno e n’ato

comme se dice

e songo abituato

m’’e sento ‘ncuollo

ce songo abituato.

Quant’anno so’?

Io ce songo nato,

ce aggia muri sultanto.

Ce manco poco.

Quanno appiccio ‘o ffuoco

pe nu filo ‘e pasta

e vvote conto ‘e file

ca me so’ rimaste.

Ce faccio na semmana,

punto ‘e basta.

Ma si cuntinua

chesta jacuvella

m’aggi’ accattà

n’ata tiella pe farla

aglio e uoglio

o a barzanella

ca pure ‘o piennelo

ne tene ati ddoje,

o nuovo fritto

o nu sasicciello.

Ddoie pacche ‘e mulignane

e po’ vedimmo

si dimane arrivo.

Duie puparuole vive,

ardente

ca si jastimme

jastimme alleramente

e nu bicchiere

c’adda passà ‘o cunvento

‘e chello bbuono.

Gioacchino Ruocco

Ostia Lido                15.08.019