Quanno me sose ambresse… di Gioacchino Ruocco

 

 

Quanno me sose ambresse…

 

Vulesse fà,

quanno me sose ambresse,

nu munno ‘e cose,

ma ‘e ccosse, ‘e mmane

nun m’’a danno cchiù

chella salute

ca ce vò p’’o fà

mò ca tenimmo ‘o tiempo

e ancora qualche voglia ‘a ce levà.

 

Me lavo ‘a faccia

ca è chello ca  me serve

pe stà allerta.

Te cerco c’’o penziero

e p’‘o fatto ca staie

ancora dint’’o lietto

te vengo affianco

e m’accucculeo

comme a nu criaturo

vicina ‘a mamma

quanno v’’o pietto.

 

‘O ccavero ca tiene

me cellechea ‘o core

ma tu, tu pe dispietto

nun t’avuote

nun vuò ‘e vase ca te voglio dà.

 

Allora ce penzo e ce ripenzo

ma nun voglio accummincià

n’ata jurnata

comme aiere è stata:

meza ammusciata

e cu na voglio ‘e tutto

ca quanno addummanave

io te dicevo no

senza sapè

tu che vulive.

 

Nun voglio niente.

Me so lavate ‘e diente

e tu me rispunnive

ma che t’’e llave a fà.

Troppe ne tiene !

Ma fatte na rentiera.

Ma che te ‘mporta a te.

Me tratte comme fosse

nu furastiero

e me vuò dà cunziglie.

Ma ch’interesse tiene.

ca te faie cchiù bello ?

Mica si vicchiariello comme a tante?

Chi sputa ‘int’’o piatto

addò ce mangia ancora

pare chella jatta

ca schifava ‘o ppoco.

 

Giro e me riggiro dint’a casa

piglio ‘o curaggio

c’ancora m’è rimasto

c’’o tiempo ca m’avasta

pe fa nu poche ‘e pasta

a miez’’o juorno

ca nun me piglio scuorno

tengo già famma,

quanno me cocco ‘a sera cchiù liggiero.

 

Gioacchino Ruocco

Ostia Lido    21.10.2020