Cu ll’uocchie dint’a ll’uocchie

E si me faie ancora nu dispietto

te piglio ‘e pietto

e te ne dico quatte.

A musso a musso

cu ll’uocchie dint’a ll’uocchie

e po’ vogli vedé

che me mpapucchio

ca dice, nun vò dicere

ma in giro vaie dicenno

comme e quanno…

chello c’avimmo ditto

e avimmo fatto.

E ce vulivo tu

pe fa sti ccose ?

Quanno zi’ Rose m’addumannaie pecchè

i’ le dicette

chello ch’era overo

ca tu nun ire

ll’ommo cchiù sincero

e io nun ero ‘a femmena pe tte.

Pecchè ? Pecchè….

nun sempe simmo fatte

uno pe n’ato.

Tu tiene ‘e friarille dint’’e chiocche

e a me me vene ‘o ttuosto int’’e denocchie

e nun me chieie ‘a vuluntà ‘e llate

e tu ca te crideve nnammurato

ire sultanto nnammurato ‘e te.

Uno ca vo’ fà sempe ‘a capa allerta,

uno ca nun le passa

manco p’’a capa

ca so’ na femmena e isso nun m’è frato.

Ca si ce pruovo ancora n’ata vota

succere ca si tu ca ce arremiette

e haie voglia ‘e aspetta pe nu cunfietto.

Gioacchino Ruocco

Ostia Lido   25/05/2013

Inserita nella raccolta “Tipi..........”