Quanno ‘o penziero s’accorcia...

Quanno ‘o penziero s’accorcia

e se mette paura

pe n’ombra c’arriva ‘a luntano

cagnà via a che serve si è n’ora

ca sempe cchiù scuro ‘o cielo se fa ?

Muro muro, ma nun se po’ fa

ogne vota sta vita

ca basta nu sciuscio

pe’ farla girà comme ‘o tiempo

d’’e juorne ‘e trubbeia.

Che ne sape chi dice sti ccose

quantu mmale m’è fatta qualcuno

ca na sera ‘e luna lucente

senza dì na meza parole

me facette suffrì comme ‘o viento

quanno sfronna nu rammo a settembre.

Hanno voglia ‘e dicere ‘a sera

na guagliona adda stà int’’a casa.

e si esce adda asci ncumpagnia

o nziemo a nu frato  ca po arreparà.

Nun po’ essere overo

c’‘o munno s’è fatto accussi!

Chi vo’ bbene nun tene curaggio

e chi piglia se piglia ogne ccose

ca pure na rosa ne soffre

si passano ‘nn ‘a cuoglie a duvere.

Rosa ‘e maggio, cu ‘a scusa ‘e ll’ammore

quanta rame spezzate ca tiene.

E ‘a freva cchiù forte me piglia

quanno ‘o cielo se scura e fa sera.

C’aggia fa  pe sentirme tranquilla ?

Cagna via ? E addò vaco ? Addo corre ?

Addo trovo riparo si pozzo ?

Si pe farme curaggio

manco maggio ce po’ !

Gioacchino Ruocco

Ostia Lido             08/06/2013

Inserita nella raccolta “ Traduzioni dal greco”