Faito

Veneveno sere ca s’addurmeva

senza fa mistero  ca teneva suonno,

durmenno comme fa na criatura

stanca ‘e na jurnata ‘e viento

o acqua ca te fa ‘e lavarune.

Tante so ancora ‘e bellezze soie

ca se sceta comme a nu frungillo,

speranzuso c’’o tiempo se fa bello

già ‘e primma matina

appicciannese ‘e culure frische e allere.

Faito c’ormaie è na cartulina

me fà tremma ‘o core

comme a quann’ero guaglione

saglienne fratta pe fratta,

pe dint’’e canalune addò ‘a gioia,

ch’è sempe nu mistero, se pigliava

l’anema e comma a na cumeta

saglieva senza sentere ‘a fatica,

sterduto ma pasciuto ‘e sentimente

ca ogne vota ritruvavo overo.

Me sembrava  ‘e tucca ‘o cielo cu na mano.

Mò saglieno ‘e ricorde chianu chiano

pe vie c’ancora teneno voglia

‘e arrevà ‘ncielo o pe chelle

addeventate sultanto nu sentiero

acchiappannemo a na mane

ca m’assicura ‘e arrevà ‘ncoppo

ancora sano, ancora c’’o currivo

‘e guardà ‘o mare ca me porta a spasso

pe nu culore ca me pare ‘o cielo

a capa sotto pe scupircchià ‘o mistero

‘e tanta bellezza ca ce ha dato Ddio.

Nun chiagne ‘o tiempo mio,

ma chillo ‘e ogge

quanno veco ll’aria che tremma,

quanno s’avota ‘o cielo

pecchè na vota ‘o ffuoco

e n’ata vota ll’acqua

pare c’’a muntagna stracqua pur’essa

e se ne scenne  chianu chianu

fino a Scanzano

preta pe preta.

Gioacchino Ruocco

Ostia Lido    23/01/2015 
Inserita nella raccolta "Ce steva na vota"

Da Via Quisisana