Dimane è Natale...

Dimane è Natale.

M’accatto ‘o giornale,

e leggo ogne rigo

e cchiù tarde

quanno me sbrigo

me faccio dduie passe p’’a villa

cu ‘ mane dint’’e capille

cercanno ‘e capì

quanno ‘a vonno ferni.

Si no me carreco ‘a pippa

e ‘nziemo cu Peppe

jucammo a scuppetta

e chi ‘a dice cchiù grossa

se magna ‘a purpetta.

So’ l’osse, ‘a vicchiaja

ca nun me fanno stà

cchiù cuieto.

Vutannemo arreto

m’accorgo ‘e l’anne ca tengo.

E’ ‘o passo

ca me fa fesso.

E’ sempe ‘o stesso,

ma l’anno passato

‘e stu tiempo

ero arrevato

già abbassci’ ‘a spiaggia.

Me faccio curaggio

e ‘a ‘rraggia me passo.

Si truvasse a qualcuno c’’o spasso,

doie semmente

me jesseno bone.

Attuorno

nun veche nisciuno:

so’ maccarune

o menesta

c’’o broro ‘e gallina ?

Stanno sulo

vaco sbarianno.

A me basta ca st’anno

fernesse cuieto

pe me , pe ll’ate, ‘e pariente

ca nun teneno niente ‘a penzà.

Nu male ‘e riente

e subbeto chiammeno.

A me l’augurio ‘e chist’anno

m’hanno fatto sti prete

ca ‘a tant’anne me vedeno

jì a nnanzo e po’ arreto

p’‘e vie ‘e chistu paese

ca pure scannate

stanno a fa festa n’ato anno.

Gioacchino Ruocco

Ostia Lido           24.12.016