Tiempe 'e neve

Tiempe ‘e neve…

Nu juorno liegge

ca simmo troppo assaje

c’’o grano nun avasta pe mangià

e n’ato ca nasscimmo poco

e ce accerimmo

comme ‘o flitto ‘e mmosche.

Nun saccio a chi aggia dì

ch’è beneritto

e a chi ammolla palle

tutt’’e juorne.

Me sento afflitto

ca nun capisco

chiste che juoco fanno.

Fa cauro e ‘a gente se lamenta,

Fa friddo e ‘o munno pare

Na samenta janca

Ca si staje bbuono

Si quanto meno stanco

‘e correre pe dà na mano

a chillo ca so’ sante

e stanno in contemplazione.

ca se ne so’ juto

‘ncopp’a na muntagna

a sfugà tutt’’a fantasia.

‘E tiempo n’è passato

‘a quanno simmo nate.

Avesseme ‘mbarato

almeno a scanzà ‘e guaie.

Tenimmo sempe a dicere qualcosa

quanno nun ‘a sapimmo fà

nu O cu nu bicchiero

facenno però guaie

ca nun sia maje

qualcuno c’’e scunziglia

ne passa cchiù ‘e nuie ch’’e facimmo!

Si vene vierno

chi s’appreparo ‘o ffuoco

pare ‘o scemo d’’o paese

quanno chi ‘o succorre le fa ‘e spese

e fa ‘a fiura manco fosse ‘o re

quanno isso parla

e se la menta ca

l’hanno fatto aspettà

pe quatto juorno.

Qualcuno s’avesse piglià scuorno,

ma isso ‘na mazziata

‘a tutte quante.

                                                               Gioacchino Ruocco

                                                               Ostia Lido           25.01.017