'A Merica

Poesie

domenica 13 maggio 2018

‘A Merica..

‘A Merica..

‘A Merica è tutto n’atu munno,

nu munno a pparte,

è proprio n’atu munno.

‘A Merica è America

diceva ‘o prufessore.

Ce truove tutto cose.

‘O mare assaie cchiù futo,

’e vie longhe longhe,

palazzo ca ormaie stanno ncielo,

nu sacco ‘e ggente

ca parleno cchiù lengue

‘e chello ca ce stanno

‘ncopp’a terra.

Haje voglia ‘e cammenà

si tiene voglia

e haje voglia ‘e t’addurmì

si tiene suonno.

Hai voglia ‘e t’’a spassà

si tiene annoglia

e si te scuorde ‘e te

chi sa addò staie,

ma chi te cerca.

Te pierde e nun te truove

si no a te stesso.

E a chi faie fesso

si tutte quante

so’ cchiù fesse ‘e te ?

Si si gnurante

che se ne ‘mporta

‘o riesto

allarghe ‘a mano

e truove chi t’’o porta.

E ll’uovo pure llà

‘o fa ‘a gallina,

ma po’ succede

ca nu juorno a n’ato

te fanno deputato pure a te

si ‘e fessarie ca dice

‘e renneno felice

e faie chello

ca vaie dicenno.

Ce stanno pure llà

‘e malamente.

Baste ca nun ‘e daie cunfirenzia,

c’’a capa toia

tene cchiù pacienzia.

Si dice ‘a verità

te vonno bbene

e può campà cientanne

si ‘o pretienne.

Pe ghjì a na parta a n’ata

ce vò tiempo.

C’’o tiempo tuio

ce faie chello ca vuò,

Chi te cuffea, ma chi t’ha cuffiato ?

Chello ch’è stato è stato

ma a chillo paese

addo nuie simme nate.

Addò tu sempe n’ato ire,

pure ll’inferno
s'era scurdato 'e te

fino a ca ’n ascette ‘o terno

e te truvaste attuorno

gente senza scuorno

a farte maraviglie.

‘A Merica è ‘a Merica.

Viato ‘o prefessore c’’o dicevo,

ma a isso chi ‘o dicette.

ca ce rignette ‘a capa ‘e tanti ccose

c’ancora ogge

‘o core nun riposa

pe stà scetato

pe s’aizà pe primmo

pe ghjì’ ‘a truvà ‘a Merica addò stà

primma ca s’arriposa

p’’a fatica !?

Gioacchino Ruocco

Ostia Lido          13.05.018

Dedicata al prof. di geografia Savarese