Dint' a na casa 'o vicolo Licerta

Dint' a na casa 'o vicolo Licerta

Quanno ‘o treno passa

‘ncopp’è nu sconquasso

ca mentre te rilasse

te passa ‘a voglia ‘e fà

chello ca stive a fà.

Si era na carezza

cu tutt’’a rebulezza

e ‘o triemmo ‘e chesta casa

pare na maniata

e quanno mmiez’a via

c’è ggente ca fa sti fetenzie

‘e vene a te tuccà

cu na malvagità,

ca po' te siente male

pecchè nun staie a 'e commete

‘e chi se piglia chello ca nun

l’attocca e cu ll’amoro  ‘mmocca

l’avisse ’accise primma

‘e fa sta carugnata si sulo

‘ntiempo te ne fusse accorata.

Quanno ‘o treno passa

sott’a galleria

pare ca passa invece

dint’’a casa mia

senza avè  ditto:- Trase.

‘E primme tiempe

me so venute ‘e vierme.

M’hanno ‘ncarmata

quase tutt’e juorne.

Guarda ca po’ te passa.

Ma quanno sto nervosa

‘o sente ancora.

Quannno ‘un ‘o sente

Sarrà passata ll’ora,

ma ogne tanto scassa

‘E vvote’o perdo ‘o treno,

quanno se mette a chiove,

quanno 'a gallina canta

e me fa ll’ove.

Tengo nu poco ‘e terra nnanze.

Ma ‘o male  ‘e panza forte

é quanno ‘o vienari

tu parte e te ne vaie

e tuorne ‘o llunnerì

cu tanta cose mmane

ca quanno vaie pe mmare

tuorne c’‘o bbene ‘e Ddio

pecché ‘o mare aonna

ca quanno suono a porta

me scordo ‘o treno mio

e tutte 'e muorto

ca me songo care

ca quanno vaie chi 'o ssa

si tuorne pe farme scuordà

ancora chistu treno..

Gioacchino Ruocco                                       

03.02.019   Ostia Lido