Zucchero e cafè

I’ quanta pacche ‘e zucchero e cafè

c’avimmo regalate

pe farte piglià n’ambo a fuggiata.,

nu posto ‘nterra,

pe te dà ‘a fatica

c’ognuno va cercanno pe campà

quanno s’è fatto gruosso

pe cunservà na certa dignità.

E’ overo c’’a fatica è schiavitù

ma quanno pigli’ ‘e sorde a fino mese

ogne ccose c’accatte

tene ‘o sapore suie

e no chill’ate

ca nun sanno ‘e niente

senza nu poco ‘e sale e condimento,

magnà ca te se ‘nzeppe dint’’e diente

e ‘un se fa gnottore

manca si è mazzecato

pe tutta na jurnata.

L’aiuto ‘e ll’ate

nun è sempe na gioia,

si chello ca te danno

'e vvote è jastemmato.

Truvà nu posto,

si nn’anduvine ‘a sciorta,

è nu turmiento

ca nun te lassa maie.

Pigliate nu cafè si no t’’o scuorde

quanta pacche ‘e zucchero

avimmo regalate,

ca nun aesce sempe a ffuggiata

e ll’ambo ch’è pigliato e quanno torna ?

‘A rota gira e quanno esce

nun ce sta scampo si è tuccato a te

e penza a tutt’’ o zucchero e cafè…

c’avimmo regalato….sulo pe te.

Ostia Lido       25/10/2012

Inserita nella raccolta " TIPI "

di Gioacchino Ruocco
in via di pubblicazione su questo blog