Pare ca vo’ chiovere…

Pare ca vo’ chiovere

pure stammatina.

Stanotte ha fatto lampe a meliune

e ‘p’’a sagliuta ‘o Squato, si chiove,

vene nun lavarune

ca se ne porta ‘e case.

Quanne trase settembre fa nu tiempo

ca chiove tutt’’e juorne

e ll’ate appriesso.

Me pare ca va ‘e presso ‘o cielo

‘a menà acque nterra

tanta ‘a campagna è secca.

Hanno arracquato nuttate sane

pe calmà ‘o turreno

ca teneva sete.

Sputazza mmano

pe tenè ‘a zappella

e surze ‘e vino pe scetà ‘o cervello.

Ch’estate è stata !

‘O ffuoco attuorno e ncielo.

Bastava nu supire p’appiccià

chello ch’era sicco

e s’addurmeva int’’e surche

juorno pe juorno

ca si chiuveva

redeva sta campagna

chiena ‘e verde e pummarole rosse.

Na povere

ca te veneva ‘a tosse

e ‘un te faceva respirà.

Sott’a na prevula

a chiagnere e a pregà.

Ma ‘o pataterno chi ce ha fatto fa

tutto stu sole ?

E’ overe ch’è stagione

ma quantu bbene c’ha abbruiciato ‘o sole.

Sperammo sulo

ca nun affoga ‘a terra

comme ‘a guerra passata.

ca mò ca sta chiuvenne

pare nu triato: chi rire e chiagne

e chi apetta e tremma.

Gioacchino Ruocco

28/08/2013 – Ostia Lido