Via San Bartolomeo

Via San Bartolomeo

Campavemo ‘e rimpetto e te vedevo

sultanto quanno ‘a sera riturnavo

d’’e cantiere abbascio Ruvigliano.

‘O vico stritto stritto

me permetteva  ’e te guardà

deritto dint’a ll’uocchie.

I’ ero sicco comme a nu speniello

e tu ‘a piccerella ire pe me

quanno speruta me guardave

e me pigliave  ‘e mmane

pe nun te scurdà ‘e me dint’’a nuttata.

L’ammore ‘e chilli juorne

nun l’aggio maje appiciuto.

Patete strillava ch’ero

troppo gruosso pe tè

ca ghive ancora a scola

d’’e moneche a Scanzano.

Tenive sirece anne e io vintuno.

Avive sturià n’ati dduje anne.

Tenive ammore ca t’abbruciave ‘o core

e ‘o core mio faceva nu remmore

cchiù forte d’’e rammere c’ammavo.

‘O vico è ancora llà senza nu sciore

e cu n’addore ca l’arriva ‘a mare,

 na lenza ‘e sole c’appare sule

 quanno nun tene addò s’arreparà

o p’asciuttà ‘e culate ‘e panne

quanno ‘a ggente lava e spanne.

‘E vvote basta niente c’a vita cagne strata.

Cagnaje casa p’accumpagnà ‘a famiglia

e ‘o juorno ca turnaje era ‘a stagione.

Tu stieve a farte ‘e bbagne sotto Puzzano.

Ogne dummeneca facevo quatto passe

izannemo cchiù ampressa ca putevo.

Passavo dinto ‘o vico e te siscavo

ma po' comme a nu scemo rummanevo

fino a ca nu juorno te 'ncuntraie

cu n’ato affianco allera e surridente.

I' me giraje e tu nun t’accurgiste

ca io stevo a duje passe arreto a te.

‘O ccagnà  casa ancora ‘o benerico!

Restarte amico nun era arte pe me.

Quann’uno è peccerella

meglio ca va accussì.

Te guardo ‘e vvote ma int’’e penziere.

Quanno passo p’’o vico spero ‘e te vedè

o pe m’arreparà d’’o maletiempo

comme fa ancora ‘o sole ca rassumiglia a me.

Gioacchino Ruocco

Ostia Lido                 2015/11/07

Inserita nella raccolta “Ce steva na vota….”