…certi juorne c’’o chianto

N’aggio passate tante

ca certi juorne  c’’o chianto

me ce lavo ‘a faccia.

‘O cconto a me stesso

pe me fa fesso

ancora n’ata vota

ca a chi ‘o conto conto

me guardemo

smarrute

senza capirce niente.

Nun è nu male ‘e diente

ca se cura,

nun è nu male ‘e panza

ca po’ sgrave.

E’ chella trave

ca t’è caduta ‘ncapa

 facennete na scrimma

tra ‘e capille

e t’arricuorde

‘a quanno piccerille

nun ‘a fernive ‘e chiegnere

manco c’’o zezzillo

d’’a vacca prena

ca te jeva a genio.

N’aggio passate tante

e nun ne scordo una

ma faccio capriole,

comme ‘e maccarune ‘e casa

tutt’’e juorne

facenno ride a ll’ate

pe alleggerì ‘a capa

ca me fa ancora male.

‘O juorno ca io more

sarrà na festa

ca fernarrà stu chianto

c amò te sto cuntanno

pure  a te

pe st’occasione...

N’aggio passate

e ne passo ancora

ca primma ca io more

ce vo’ tiempo,

ma chillu tiempo

ca me serve ancora

pe nun me stà maie zitto

ca zittu zitto ll’ate

fanno e sfanno

e po ‘ songo semp’io

ca spanne ‘e panne

ca ognea ghiuorno lavo

pe metterme pulite

pe nun me piglià scuorno.

Gioacchino Ruocco

Gioacchino Ruocco

Ostia Lido           04.04.2020  h. 08,37