Si ce sentimmo figli’ ‘e Don Rafele… ?

Raffaele Viviani
Castellammare di Stabia - Villa comunale

Si ce sentimmo figli’ ‘e don Rafele

che ce guaradammo a fa cu n’aria scura,

‘e suspetto, c’’o ffele ‘mponta ‘o musso ?
Tu che t’è fatto russo comme ‘o russo

quanno te busso pe sapè che pienzo

me dice c’’a capa ‘e si’ Vicienzo

te gira e nun t’’a siente manco ‘e me vedè.

Allora pecché m’è dato ll’amicizia

si tiene ll’avarizia dint’’o core?

Quann’esco fore sento n’aria nova,

n’aria ntretosa  ca m’esce ‘a pietto

sempe allera, ca m’arrecrea ‘o core.

Vulesse sta cull’ate mmiez’’a via

comme a nu bancunaro perdenno

‘o tiempo ‘e na jurnata sana

pe scemunì appriesso a nu penziero,

na virgula, nu fatto, nu mistero

e invece songo chillo ca  respera

‘e truvarte all’appuntamento

all’ora necessaria. Nu cumplimento

fa sempe bbene, ma tenerte mente
ancora meglio quanno me vene ‘a voglia.

Invece ll’amicizia che m’è dato

a che me serve si po’ t’’a si scuordata

e nun te faie vedé pe na semmana ?

Pur’io tengo a che fa, ‘e mmane chiene,

pur’io  ripenzo a chello c’aggia fatto!

Si tu nun viene parlo cu Rafiluccio,

m’assetto nnanze ‘o monumento suio
‘e ce guaradmmo. ‘O truvarrà ‘o mumento

e me dicere qualcosa, na parola

farme na capriola dint’’o core.

M’’a veco brutta ‘e vvote. ‘O viento ‘e mare

me mette dint’a ll’uocchie lacreme

ca sanno ‘e penziere malamente

‘e quanto ‘a ggente è faveza

e vò sembrà ‘nnucente.

Gioacchino Ruocco

Ostia Lido                  2015/12/02