I’ che malincunia…

I’ che malincunia

saglienno pe sta via.

Si sapesse addò me porta

chesta sporta cchiù liggera se facesse.

Quanno scengo pare corta,

quanno saglio se fa storta

e ‘a sagliuta è cchiù pesante

forse pecchè tengo

assaje cchiù anne

‘e quanno ‘a scengo.

Pe saglì quase m’appengo

a ogne buco ‘e chesti mure.

Sento ‘e passe cchiù sicure

e po’ l’anzia cchiù liggera.

Si me dice bonasera

chi me passa affianco

io me sento meno stanco.

Guardo sotto ‘a Caperrina,

guardo ‘a via ca me sta ‘nnanze

sento ‘o viento e ‘a luntananza

‘e stu munno c’ogne tanto

faccio a pere cu ‘ e lagnanze

ca ll’età me mette ‘ncuollo.

Steve ‘e casa ‘a Mezapreta

dint’’o vico Surrentino,

mò ce arrivo e torno arreto.

E’ ancora sgarrupata

chella ch’era ‘a casa mia.

Sulamente ‘a fantasia

qualche vote m’’a dà ancora.

Ll’aria è fresca e pare ‘a stessa

‘e quann’ero nu guaglione.

Qualche voce m’arricordo

ma stu core sta suffrenno

o me fermo e m’arreposa

o me sceto a chistu suonno

c’ogne tanto me ne porta

cu na sporta ‘e tarallare

a fa ‘o giro ca facevo

fino a ca nun te vedevo

fresca e bella

abbasci’ ‘a guardia

guagliuncella ‘nnammurata

c’’o surriso ‘e na pupata.

Quantu tiempo ch’è passato,

m’ogne vvota ca ce passo

si nu spasso ‘a ricurdà.

Ogne vaso ca me torna

me fa ancora cunzulà.

Gioacchino Ruocco

Ostia Lido    06.05.017

Inserita nella raccolta “Ce steva na vota…”

COMMENTI 

		Anna Di Cerbo 6 maggio alle ore 16:46
Una malinconia vibrante di profonda nostagia e coinvolgente per l'efficacia delle immagini a corredo. Una lirica carica d'atmosfera!