Ogne vote ca me faie felice… R. Gioacchino

Ogne vote ca me faie felice…

Ogne vote ca me faie felice

sento qualcuno ca passanno dice

ca so bbiato ca tu me vuò bene,

senza guardà po’ si te cunviene.

Io tanti cunte nun m’‘e voglio fà.

M’avasta o nun m’avasta

me sento n’ommo cuntento,

si no me jevo a chiurere ‘o  cunvento

ca manco là ce stà gente appaciate,

ca teneno ‘o diavulo nemico

e Giesù Cristo nun è sempe n’amico

quanno stanno a penzà a ‘e fatte proprie.

Ero guaglione quanno ce penzavo,

quanno cu ’a nonna e ‘o nonno jevo da loro,

a San Francisco, e se cantava ‘ncore

‘a gloria soia, chella d’’o puveriello

ca se levaie a cuollo ‘o bene ‘e Dio

dicenno :- Chesto è vuosto, nun è ‘o mio,

‘e chi n’ave bisogno e nun ‘o tene

‘e chille ca mo campano ‘int’’e pene.

E invece ognuno ‘e lloro tenenno

‘a mangiatora troppo avascia

nun senteva l’ambascia ‘e san Francisco

ca se privaie ‘e ttutto, mò ‘o capisco,

ogne vota ca me faie felice

vurria fà comme facette Isso.

Ma ‘o bene ca me daie nun è oro

ca pozzo spartere senza tenerme

‘o core felice comme a quanno

cu ll’amice jammo a pazzià ‘o pallone

e na parola ‘e pazzia comme a na

palomma passa ‘a  na vocca a n’ata

cu mille resate ca fanno ‘o core

cchiù gruosse ca puo’ murì pe ll’ate

senza scunfirarte, senza darte

nu minuto ‘e pena p’’o bene amato.

Gioacchino Ruocco

28.05.017               Ostia Lido