Ma quanno maie na vota

C.mare di Stabia - Lgmare allagato dalla pioggia 2018

Ma quanno maie na vota

Cu ‘e vuommeche che faie

me faie passà nu guaie

diece vote ‘o juorno

appena te sta attuorno

qualche si’ nisciuno.

Me vene ‘a vermenara

appena spicche inglese

sempe cu sta pretesa

ca tu si ‘a meglio’e chelle

ca ‘ngiro mò ce stanno.

Ma quanno maie na vota

mettisse ‘a capa sotto

pigliasse ‘e cosse

e te ne jìsse addò

te passa ‘a fantasia ?

Parlà cu te è tiempo

ca me ne vaco a spasso

sulo e ca nu juorno ‘e chisto

te lasso  mentre te staie

nu passo annanze

ca manco te n’accuorge

si io te dongo ll’uorgio

invece d’’o cafè

ca rieste ‘a meglio

senza stu muorto appriesso.

Addò te canuscette

ca doppo nu minuto

tu me sapive e io no ?

Ma comme ‘un t’arricuorde ?

So’ io ca me scordo,

m’’o ddice ogne mumento.

M’è fatto ‘o monumento

alla dimenticanza

e saie che male ‘e panza

me vene si te veco ?

Ma pigliala cu ‘e ddete,

m’ha ditto n’ata mpesa.

Cu tutte sti pretese

chi ‘a vo ca s’’a pigliasse

senza calà maie l’asso.

Mentre s’’o spassea

‘o lungo mare nuovo

‘a ggente ce s’affoga

quanno se mette ‘a chiove

ca cchiù nun trova n’uovo

pe farse na frittata

‘o nu palummo ‘e mare

ca vole ‘e sparpetea

o chi tita ‘a currea

si no perde ‘o cazone.

Gioacchino Ruocco

Ostia Lido           09.04.018

Inserita nella raccolta “ A fronne ‘e limone”