Si torno arreto

Si torno arreto…

Si torno arreto

nun è p’’a scunfirenzia

ca ‘e vvote me piglia.

Tengo famiglia

e me ne stesso ‘a casa dint’’o mio

dicenno ‘e ccose ‘e Ddio

quanno m’’o sento,

quannno ce crero tanto

e ‘o sentimento

se fa cchiù forte

o cchiù malamente.

Che t’aggia dì ca soffro ‘e nustalgia ?

E che ne saccio

pecchè ce penzo ancora ?

Quanno me passa,

chi ‘o sa si po’ ce torno ?

Ll’urdema vota

ce so’ rimasto a curto.

‘O lungomare

steve ancora arreto,

ce steva ancora ‘a ggente a faticà.

Po’ ‘o lavarone,

ca quanno chiove arriva,

‘o steva n’ata vota a scuncecà.

Chi sa si ‘a villa

po’ l’hanno fernuta ?

e ll’acqua d’’a Madonna si ce stà ?

Basta na chioppeta

ca fernesce ‘o munno.

Vì’ comme a Cassa armonica è ridotta !

‘O meglio cerca sulo n’arravuoglio

e ‘o voccapierto fa na radiocronaca.

Chi scrive scrive ancora ‘e stesse cose

chelle ca già Michele raccuntaie*.

Si tutte ‘e guaie

fossero sule chisto

nun saccio pecchè Cristo s’’a piagliato.

Si torno arreto

sarrà na cammenata

e na chiagnuta certa.

Dinto Licerta che ce aggio lasciato ?

A Mezapreta, ‘a casa addò nascette

è ancora sgarrupata.

Gioacchino Ruocco

*   Figli difficili – Michele Prisco