Si tenesse nu poco cchiù 'e speranza...

 

Si tenesse nu poco

cchiù ‘e pacienza

e nun me ‘mpurtasse

‘e chello

ca dice ‘a ggente

quanno sta malamente,

‘nzieme cu te

pure senza fa niente

fosse felice.

 

Si attuorno me guardo

c’aggia di, c’aggia fa

pure c’’a panza vacante

songo cuntento

quanno veco ‘ a Muntagna

llà bbascio

cu ‘e culure ca tene

e me scorde ‘e quann’ero guaglione

o ‘e quanne faceva

tremmà tutt’’e juorne

facenno sgarrupe

facenno macerie.

‘A tanno

qualcosa è cagnata,

soì cagnate ‘e fetiente ‘e na vota

e chille ‘e ogge

nun so’ cchiù ‘nnucente.

‘A colpa è d’’a gente

ca preferisce ‘e pavà

quanno ‘e vanno a cercà.

Anzo so’ cuntente

pe fa rompere ‘e ccose a qualc’ato,

ca sgarrà p’’o troppe sparagno ca fa

quanno ‘e patte so’ ate.

‘Ncopp’a na varca è sempe ‘o patrone

chillo ca tene ‘o cummanno

e ‘a rezza se tire

quann’’o mare t’’o dà

ca è tanto quann’è ‘a stagione.

‘O pesce cchhiù gruosso

tene nu prezzo

e chillo tantillo si ‘o saie cucinà

nu fritto, duie fritte

e si tiene ‘a voglia ‘e mangià

n’atu fritto

dimane te faie

o accatte p’’a via, ‘int’’o cuoppe.

 

Agge tenè nu poco cchiù ‘e pacienza

e farme duie cunte

quanno ll’abbascio tu spunte

e me viene vicino,

mangianno lupine, nucelle

semmente, abbrustulite,

seccate ‘o sole

e senza meza parola

avutanno p’’ò vico

quanno ll’ombra ce astregne

t’acchiappo chhù forte

e te dongo nu vaso

ca ne tengo cient’ate

a darte cchiù nnanze

c’a nu mese ll’avanze…

si nun sbaglio cu ‘e cunte…

 

ostia Lido           20.08.2020