Tiempo ne tengo…

Comm'è sta vita mia ?
Tiempo ne tengo

e nun me stanco maie

e scrivo na poesia tutt’’e juorne.

E si tu vide

ca te giro attuorno

è pe t’’a fa sentì.

Te voglio bbene

cu tutto chello ca ne vene.

E qualche modo

te l’aggio fa sapè

si no chistu penziero

me dà sule turmiente

ca io te voglio bbene

e tu nun ne saie niente.

Si stongo sempe attuorno

che te cride ?

Ca sto facenno

‘a mosca ‘ncopp’’o ddoce ?

I’ nun me coce,

i' me so’ cuotto già.

Pe quantu tiempo dura ?

E che ne saccio !

Stongo appoggiato ‘o muro

chi me ne caccia.

E quanno me ne vaco ?

Quanno chesta ferita

se sarrà sanata

o quanno ‘o tiempo

accunciannese nu tanto

me porto a n’ata parte,

addò ‘a canaria canta.

Gioacchino Ruocco

Ostia Lido 07/12/2012

Inserita nella raccolta “Suspire ‘e miezojuorno”