Nun so' capace...

I’ nun ce ‘a faccio a ddeventà nu santo,

pe cchesto ve saluto e me ne vaco.

Ce aggio pruvato, ma tutt’’e juorne

é stato nu calvario.

E aggio purtata ‘a croce fino a ogge

senza truvà na via cchiù liggera.

Era pesante  e nun sembrava overo

ch’era ‘e Giesu Cristo.

Ogne juorno i’ ne levave ‘a coppo

pise comme a chille  c‘hanno acciso

ncroce ‘o figlio ‘e Ddio cchiù ‘e na vota,

ma rigirava ‘a rota.

E cchiù saglieva e cchiù amara se

faceva l’acito ch’è sapurito

sulo quanno è poco. Tagliava ‘a vocca

comme si fosse vrito.

E ‘a sera m’addurmevo stanco e strutto.

Sempe cchiù strutto m’aizavo all’ora

c’’o sole nasce pe’ dà forza a ggente

‘e jì ancora ‘nnanze.

E ‘a vita addeventave na miseria

senza tenè cchiù niente pe dà all’ate.

Parole almeno ca benedicenne

danno na cunzulata.

Gente c’ave bisogno ‘e tanta cose,

d’’o bbene ‘ e Ddio pe primmo cc’ha criate

facenne ‘a via ca porta ‘nparaviso

e no d’’e disperate.

Ca ce pruvasse n’ate ‘o posto mio

ca nun songo capace ‘e murì acciso

d’’o male ca m’ave ntussecato

pe tutte chiste juorne.

Mò che ne faccio ‘e chesta vita mia ?

Stanno in disparte dicenne ‘e ccose ‘e Ddio

aspetto nu signale e quanno parte

cercate ‘e nun parlà ancora ‘e me.

Comme a nu puveriello v’’ o dumande,

comme a nu vicchiariello triste e stanco

c’ave bisogno ‘e pace

c’addeventà nu santo ‘un è capace.

Gioacchino Ruocco

                                    
                                      Ostia Lido     16/02/2013
                                                  Inserita nella raccolta "Tipi... ma guarda che tipi"