T’’o nnieghe sempe.

Bugie / Frappe da "Alberghiera.it"

Nun sulo ll’atu juorno,

t’’o nnieghe sempe.

Dice na cosa

e po’ ne dice n’ata.

Cose ca già m’è raccuntate

m’’e ddice ‘e n’ata manera

e arrivammo quanno è ssera

cu mille appicciche

‘int’’o core.

Si nun more nu juorno,

n’ato è sicuro.

Me perdo ‘int’’o scuro

certi ssere

venenno da tte.

M’’e ddice ‘int’a lluocchie

‘e buscie

e po’ ride

e redenno me daie

l’impresione c’’o ssaie

ca ‘e buscie ca dice

nun me fanno felice,

ma nun cagne.

Ma tu ‘e me che vuo’ fa

ca vuo’ sultante pazzià ?

C’ogne juorno

te mmiente qualcosa.

Mille spine tu tiene,

sì rrosa!

Senza spine che fusse ?

Addurosa,

ma tu m’arrepasse.

E nun saccio

ancora che fà

si ‘un te passa

sta voglia ‘e pazzià.

Gioacchino Ruocco

Ostia Lido                    14/02/2013

Raccolta “ Suspire ‘e miezejuorno”

Dedicata agli innamorati per la festa di San Valentino