Visanola

Quanno ‘o core me chiagne

e stento a  truvà

comme pigliarte

me faccio a pere stu munno

e cu ‘a scusa ‘e stu fatto

me n’aggio fatte ‘e cammenate

saglienne e scenneno p’’e vie

ca nun  avevo cchiù fatte

‘a tant’anne.

Na vota p’’e fratte,

e po’ dint’o Cugnulo

arrampecannemo comme a nu mulo.

Ogge cuieto cuieto

so sagliuto a Visanola

pe sentì n’addore ‘e ciardino,

‘o friddo d’’e prete

ca m’ero scurdato

‘a quann’ero guaglione.

Vutannete arreto

‘nun sempe  ‘o mare se vere.

Saglienno te pare

ca te staie perdenno

pure si attuorno

ce truovo na casa

nu sciato ‘e qualcuno

ca guarde e vulesse sapè

tu chi sì, 

addo vaie 

e che vaie facenno.

Pe sta via c’ancora s’appenne 

fino ‘o Castiello

attuorno so sule ciardine

‘e arance  e mandarine,

nu verde ìmbriacato

‘e aria fina

ca sape n’addore

ca m’ero scurdato

a quann’ero guaglione.

Quanno te firme pe piglà sciato

te pare c’’o munno è cagnato,

e quanno arrive là ‘ncoppo

doppo che faie ?

Ogni ghiuorno è n’ata sagliuta

quanno scinne, si tuorne

'e vvote pe nu starnuto.

Me sento stunato, perduto

me sento pigliato da scunfirenzia

mentre ‘o sole me cerca e me trova

comme a na lenza 'e terreno 'a scarfà.

Sterduto senza cchiù n’ombra ‘e pacienzia

si cuntinuo ‘a sagliuta fino ‘o castiello

ce arrivo ca so’ vicchiarello.

Ogne passo me tremmeno ‘e cosse

e sento ca ll’osse se stanno rumpenno.

Ma ‘o penziero

m’appenno cchiù ìncoppo

pure si è troppo pe me

addò trovo na vista

ca sulo na svista me putevo aparà.

T’aggio visto a duje passe

e nun ce credevo.

Certi vvote succere

comme a mò

ca me stevo perdenno

saglienno saglienno

e ‘o penziero ‘e na mano

pe nun m’arrenne

‘o tenevo già pronte

‘a qualche semmana.

Gioacchino Ruocco

Ostia Lido      21.10.016