E’ chistu maletiempo....

 

E’ chistu maletiempo

ca me tratteno a casa

a me sturdì

senza sapè che fa.

Te giro attuorno

e tu faie ‘a stessa cosa

comme si avesseme

sfrunnà na rosa

senza tenè ‘o curagge

‘e accummencià.

M’assetto, po’ me sose.

Te voglio dì  na cosa

e nu t’’a dico

pecchè nun vulesse accummencià

‘a solita jurnata

ca na parola tira a n’ata

e se va annanze

comme a duie nemice

ca chello ca se dice

nun va maie bbuono.

Fore ‘o terrazzo

intanto chiuve ancora

e ‘o tiempo nun s’arrenno.

Ne mena tanta 'nterra

c’’a via è nu pantano.

Nu cane se guarda attuorno

e se ne torne arreto

pe s’arrepara sott’a nu palazzo,

pe se scanzà

‘a na machina ca passa.

ca sulleva ll’acqua

e ‘a schizza a tutte parte.

 

Chi adda partì,

ma quanno parte ?

Si tene qualche soldo

meglio fa ll’arte

e nun ascì d’’o lietto.

‘O ddico a chi m’aspetto.

Quanno dimane schiove

ce vedimmo,

tantu nun vaco ‘e presso.

Chiuvesse tutt’’e juorne !

‘A vita m’’a pigliasse

campanno cchiù cuieto.

e riturnasse arreto

tutt’’e vote

ca nun te veco cuieta

pe t’accarezza,

darte nu vaso,

na parola doce

c’’o zucchero

tu nun t’’o può piglià.

Ostia Lido           29/11/2012

Gioacchino Ruocco

E’ inserita nella raccolta “Suspire ‘e mizejuorno”