Primma era tutta mare

Primma era tutto mare

e ce vuleva poco

pe mettere nun pede dint’’a llacqua.

e scaveze ‘e guagliune curreveno

cchiù  pe na scummessa

senza truvà arricietto

addò ‘a rena già s’appresentava

fino a banchina

ca già pigliava pere.

Piscà era nu spasso,

ma a vvierno,

quanno jeva ‘ntempesta,

era na festa

a vedè ll’acqua pe ll’aria

pe tutt’’e guaglincelle

ca pazziaveno

facenne ‘e gallinelle

pe nun se ‘nfonnere.

‘E guagliuncielle apprieso

assaie cchiù friarielle

comme a nnammuratiello

felice ‘e fà ammuina.

Primma era tutto mare

Ma po’ arrevaie ‘a rena chianu chianu

e mò na stesa nera sempe cchiù assaie

ca quanno vene ‘a sera

e ll’aria se fa doce

me piglio ‘o core

e se no porta a spasso

nziem’a nu ricordo

ca me strapazza e so' dulure

mentre l’onne sempe cchiù luntane

parleno appena,

me teneno p’’a mano.

Ttempeste a vvieno nun ne fanno cchiù.

Ormaie sto sulo,

chi sa addo staie tu.

Gioacchino Ruocco

Ostia Lido, 29/11/2014

Inserita nella raccolta "Ce steva na vota"