‘O sole sparpeteja dint’a sta strata!

‘O sole sparpeteja  dint’a sta strata!

Quanno ce trasa nun ne vulesse ascì!

Ogge culate stese ‘un ce ne stanno,

ma ll’ati juorne ce ne stanno tannte

ch’è ‘a scusa bona pe restà cchiù ‘e n’ora.

Quann’ero guagliunciello ‘o strummulillo

o tattellava ‘ncopp’e vasule o

s’affunnava dint’’o terreno tra uno

e n’ato acchiappannese ‘e pizzate

‘e chi vinceva a mano.

Mo quanno passo e ‘o veco sulitario

vuttasse ‘o tiempo e ogne cosa all’aria

p’’o fa scetà no dint’’a cuntrora

ma quanno chi è rimasto pare ca more

‘e pecundria e nun vò fà cchiù niente.

Certe ca chi ce resta tene curaggio.

Na cosa è l‘acqua ‘e maggio, chell’’e vierno

scenne cu n’arraggia ‘ncuorpo ca se ne

porta  tutt’a muntagna appriesso

senza putè ascì ‘a dint’’a casa.

Nu lavarone c’’o buco d’’o Cugnulo

avesse sfugà ‘a mare! Quanno ne parlo

tengo ‘a vocca amara. Chesta mancanza

‘e gente ‘miez’a via o se ne fotte

 o è dint’’a chiesa a dì ‘e ccose ‘e Ddio

pe quanno arriva ‘o quarte d’ora triste,

ma ‘o sole nun se scorda ‘e turnà ‘ncielo

pe doie castagne avrole e ‘a voce ca se

spanne tuorne tuorne pe fa scurdà

‘o dulore, ‘e guaie c’’o tiempo ha ripurtato.

‘O riesto songo chiacchiere, tabacchere

 ‘e legno c’’o Banco e Napule nun ha

‘mpegnato maie, ca nun so’ ricchezza

ma sulo ‘o chianto ‘e chi ‘miez’’a munnezza

se trova ognanno e nun se raccapezza.

cu tutte ‘e chiacchiere ca contano

chi tene ‘a mazza mmano e te cumanna

fino a c’’o sole nun ritorna ‘ncielo

a ricurdarce na canzone allera

ca fa cuntente ll’aneme sincere

fino a c’’o male tiempo nun ritorna

fino a ca sta gente nun se scorna

nun mette a faccia ‘nterra p’’a vriogna

quann’’o maletiempo se ne’è ghiuto

lasciannece 'a speranza 'e chi nun spera.

Gioacchino Ruocco

Ostia Lido           16.10.017

A Enrico Discolo che con le sue immagini

risveglia la mia memoria e il mio sentire

lontano da troppi anni ma mai dimentico...