Ode a chi canta Napoli e i suoi guai

Chi ‘e na manera e chi ‘e n’ata

jammo a cacà tutte a stessa parte.

Te ‘mpare ll’arte e po ‘a miette a parte

quanno addeviente ‘o scarte ‘e tutte quante.

Chi addeventa santo e saglie ‘mparaviso

mentre ancora sta campanno

o fa camorra facenno ll’ommo triste

mettennelo ‘nculo a tutte quante

o è uno ‘e chille ca tene ‘o culo rutto

e le va bbona qualunque cosa canta

 e ca si joca ll’ambo piglia ‘o terno

 ca ‘o raccumanno pure ‘o pataterno.

Meglio campà nu juorno cu ‘e solde

dint’’a sacca ca fa na vita blacca.

Tanta ‘a patacca resta sempe a te

però  vaie campanno comme ‘o re.

E te pare ca ogge si felice

tanta ll’amice songo sempe ‘e stesse.

‘E juorne songo tutte gente brava

e quanno è notte basta ca tu ‘e pave.

Quann’ero guagliuncielo c’era ‘a guerra

mò dint’’e viche ‘a fanno pure ‘e juorno

Te cresce affianco e nun se piglia scuorno,

pare nu triato ‘miez’’a via.

Ce stanno chille c’accussì adda jì.

ce stanno chille cu ‘e dulure ‘e panza,

ce stanno chille ca songo d’’a paranza

e ce sta chillo c’accussì va ‘nnanzo.

Ma comme se po’ fa ‘a cagnà ‘a capa,

‘o core, ‘e bracce, ‘e mmane pure si more

pecchè stanno murenne overamente

tant’aneme ‘nnucente tutt’’è juorno

e chi cumanna nun se piglia scuorno.

Eppure ‘o sape ma cu na faccia ‘e cuorno

prumette ogne vota ca se cagna

‘o juorno appriesso, appena se fa juorno.

Gioacchino Ruocco

Ostia Lido           18.10.017