'A pasta...

‘A pasta….

Si pure ‘a pasta mò piglia culore

nun farlo cchiù c’’o zulo ‘e pummarola,

‘a puttanesaca o cu ‘a barzanella,

doie pummarole fritte ‘int’’a tiella

e n’aglietiello frisco ‘e miez’’a terra.

Quann’io mangio voglio penzà a mangia.

nu surzo d’acqua si nun tengo ‘o vino

e ll’uocchie tuie ardente ca me vonno

ca dint’’a me se perdeno mentre te

vaie zucanno ‘e vermicielle ardente.

Quanno me so assettato e ‘a vrocca mmano

ì’ penzo cchiù ‘o rente c’’o parente.

Nun campo pe magnà ma quanno sente

n’acquiccio ca se forma dint’’a panza

e nun ce ‘a faccio a jì a parte ‘e nanze.

Miseria e nubiltà, v’arricurdate ?

Quanno Vicienzo se mette dint’’a sacca

tutte ‘e spaghette ca nun se po’ mangià ?

So’ tale e quale. Facesse nu triato

pe n’arraffà quante cchiù ne pozzo.

Ma si m’’e mange tutte a Carulina

i che ce lasce ? ‘E piatte spuorche ?

Ca quanno ‘a veco moscia modcia ‘a civo

p’’a fa cuntente ‘e comme ha cucinato

ca io m’’o squaglio mmocca, arrecriato

d’’o zuco e da cuttura ca mantene

‘a pasta cu nu niervo sempre pronto

a farse sentì mmocca prepotente

senza lasciarte di ch’è na parola

nu zucchero c’’o zuco ‘e pummarola.

Gioacchino Ruocco

29.01.2018        Ostia Lido