Ll’urdema speranza

Ll’urdema speranza

‘E vvote vaco a spannere

stu core ‘nfacci’ ‘o mare

addò ce sta nu sole

c’abbruce ogne dulore

e ‘a sera cu ‘e lampare

pe me ne jì llà fore

addò si fosse overo

fernesse tutto cose.

So’ ‘e rrose d’’o ciardino

ca ‘o ripara ‘a casa

d’’o viento d’’a muntagna

a darme ogne matina

na speranza

‘e nun sentì lagnanze

comme a nu lanìmiento

n’atu juorno.

Ca pe nu poco ‘e pace

me so’ levato a tuorno,

a miezo a tanti cose.

Vicino ’o mare

‘e vvote m’arrepose

ma tanta vote chiagno

nu chianto tanto forte

ca stongo a selluzzà.

Ma comme se po’ fa ?

Ma comme s’addà fa

si manche ‘e sante ‘a cielo

allongano na mano

pe na carezza

a chi n’ave bisogno

ca mo ca vene marzo

chi sa a ci spacca ll’ogne.

Me giro attuorno

e veco ggente triste.

Songh’io ca forse

faccio ‘o cammurrista

e levo a dint’’o core

‘e tanta ggente

ll’urdema speranza

ch’è rimasta ?

Gioacchino Ruocco

Ostia Lido    27.01.2018