Pure ogge chiove…

Pure ogge chiove na muntagna d’acqua

e nun stracqua d’’e cinche stammatina.

‘E panne ancora stise nun hanno fatto a tiempo

a s’sciuttà dint’a na lenza ‘e viento

e l’asteco pare na faccia janca

cu sti llenzole stanche’e ll’acqua c’hanno avuto.

Ho munno pare nu tavuto

c’’o cielo scuro a llutto

appriparato addo

stanno allagate ‘e case.

Ogne vvote ca chiove

ce trase assieme all’acqua ‘o chianto

‘e chi ‘a speranza ha perzo.

Pure ogge ‘o maletiempo

affoga  ‘e piante

c’’o sciummo ca sfoga

‘o male ‘e panza

e botta fore ll’acqua che l’avanza.

Tremmeno ‘e case

dint’’e fondamente

e ‘o terreno s’allenta

e se fa lasco.

Eppure ‘o Pataterno spanno ‘o sole

addo ‘a culata è stesa.

Chesta però è n’impresa

c’’o sole nun avasta.

Cuntinua ll’acqua ch’è tutto nu pantano.

Quanno mettimmo mano ?

E quanno na jettata pe fa ‘o titto ?

Gioacchino Ruocco

Ostia Lido          09/10/2013