In ricordo delle "Quattro giornate di Napoli"

Eremo tutte pisciasotte.

Eremo tutte pisciasotte.

Tenevemo ancora a vocca ‘e latte.

Mamma m’era vattuto ‘o jurno primmo

pecché nun a vulevo stà a sentì.

Facevo nu rummore ch’è buatte

ca nun faceva sta tranquilla ‘a ggente

ca vuleva durmì, s’arrepusava.

E io a chiagnere comme a na funtana.

Nu cuzzetiello ‘e pane

‘nfuso dint’’o broro d’’e fasule,

n’ato c’’e pummarole  ‘e piennelo

d’a figlia ‘e cape ‘e fierro

ca quanno na cosa a  essa  nun le jeva

cercava qualcuno a chi ‘o dà.

Io me mangiavo pure ‘e mazzacane

e me vevevo ll’aria

ca ‘int’’e curtiglio nuosto

era sempe fresca e prufumata

p’’e panne d’’e culata.

Tenevo ‘a capa sempe a pazzià

pure si ‘e tedesche attuorno jevano

facenno ‘e guappe cu ‘e mitre mmano.

Pazziavo cu Peppe ‘ o sciancatiello,

nato accussì, comme se diceva,

senza dà colpe ‘a vammana d’’o quartiere

ca, quann’ero guaglione,

chiammavano ‘a cummara.

Avesse avuto bisogno ‘e qualche taglio

ma quanno ‘o ciuccio arraglia

si tu nun l’accuntiente

tira cauce  e fuie comme fuie

c’’o criature nascetta cu na cianca

ca me sembrava a smerza

ca ‘int’’o bumardamento

nisciuno s’accurgette.

e ghiette comme jette.

Povera femmena

e povero guaglione

Sparava cchiù isso

c’’o cannone  ‘e vascio ‘o puorto

e jiastemmava ‘e muorte

‘e tutte quante

e n’accerette cchiù isso

ca tutte ll’ate assieme.

Fernuta ‘a guerra

nisciuno s’’o cacaie

Dicette chi ‘o canusceva

ca campave

vennenno ‘e mericane

dint’’a nu purtone

p’’a via ‘e miezucannone

addò se senteva cchiù sicuro

quanno ‘a pulisse

cercava a isso e a nuie

o a qualche figlie ‘e ‘ndrocchie

ch’’e rumpeva ‘ e capocchie a martellate

lasciannele  p’’a via tutte scassate

quanno fetiente ‘e mmerde,

primme lloro,

ce devene ‘ e verde faveze

pe ce mannà a dinto

quanno faceveno ‘e retate.

Nun l’aggio cchiù ‘ncuntrato.

Sulo na vota

avette n’ammasciata

ca fratemo, comm’isso me chiammava,

teneva voglia ‘e me vedè

e ca na sera ‘e chesta

sarria venuto isso a me truvà

addò isso sapeva

ca stevemo sicuro.

M’aspiette aspiette

na sera me sentette ‘o mmale ‘e pietto

e me scurdaìe ‘e dicere

a chi steva cu me:

- Si vene Peppe

dicitele ‘e ccose comme stanno,

senz’allarmarlo

cchiù ‘e tanto.

Ma so’ passate ll’anne

senza ce sentì cchiù.

Quanno ne parlo

p’’a nustalgia ca sento

me sento malamente

e sto p’’e fatte mie.

Ormaie è mmorta ‘a zia

ll’urdema rimasta.

Mò quanno mangio

sento ca nun avasta

‘a pasta ‘int’’o piatto

ch’essa scumpare

e me pare ‘e sentere

uno che rire.

‘O saccio nun ce crire,

ca ‘e muorte songo muorte

già ‘a tant’anne

ca forse nun sto bbuono

o stongo pazzianno.

Gioacchino Ruocco

Ostia Lido           17.05.2020