A RAFFAELE VIVIANI.... sperando che ritorni presto in villa

A Raffaele Viviani

P’avè nu vaso a te

mò che me mmente

ca nun saccio ‘a quanto

ce provo eternamente.

E scanza a chisto

e scanza a chillo

m’attuorno tiene sempe

tanta ggente

ca io acchiappo poco

o nun acchiappo niente.

Me faie sperì.

Ormaie si comme

a chillu monumento

ca nun avesse movere nu passo

ma è già paricchio tiempo

ca ha lasciata ’a villa

e se ne ghiuto a spasso.

Ma quanno turnarraie

si ‘o maletiempo

te mette ‘o friddo ‘ncuollo

e nun può restà a muollo

si no te siente male ?

Nun saccio c’aggia dicere,

nun saccio che penzà

Vuleva pazzià cu te

ancora n’atu ppoco,

facenne ‘e guaglincielle

pazzianno ancora
‘o strummolo

“ô liscio, ’e ffiurelle,

a ciaccia, a mazza e pìvezo,

ô juoco d''e ffurmelle,

………………………………………

E comme ce sfrenàvemo:

sempe chine ’e sudore!

e “a mare ce menàvemo

spisso cu tutte ’e panne;

e ’ncuollo ce ’asciuttàvemo,

senza piglià malanne..

……………………………………………

’o cchiù 'struvito, ’o massimo,

faceva ’a firma soia.

Ma po’ chiù gruosse

‘A vita ce cagnaie…

‘A vita mia ‘a saie

comme io saccio ‘a toia

p’ ’arteteca e p’ ’a foia

Ca te sentive ‘ncuollo

Rafè, ma che te stanno a fà

c’ancora nun rituorne ?

Io stongo sempe ccà…

T’aspetto fino a quanno

‘o tiempo ca me danno

è ancora mio.

Sperammo a bbona e Ddio

ca vedimmo ‘nterra.

e no all’atu munno

e pe nu poco ‘e cavero

all’inferno.

Gioacchino Ruocco

Ostia Lido 15.05.2020

In corsivo testo di Raffaele Viviani