Ih quanto è bello stu paese mio.

 Ih quanto è bello stu paese mio...

Senza na furmicula pe terra

e ‘a funtanella ca sta vuttanno acqua

stu lungomare

è rimasto  sulo

ca  manco d’’e vvie attuorno

 arriva ‘o sciato ‘e chi nun tene suonno

ca fore a nu balcone

sta fumanno

sicarrette in quantità

pe mettere a sinco nu penziero.

primo ca se  fa juorno

pe nun sentirse  

ancora furatiero

dimane e ‘e  juorne  appriesso.

Pare ch’è morta a villa

senza a nu sciato,

na voce ‘e peccerillo

ca tene voglie ‘e correre

senza paura ca so’ piglia

qualcheduno,

pe fa  arragià ‘o pate

o sott’’o  vraccio ‘e n’ato

capace ‘e suspirà:

- Ih quanto è bello

chistu lungomare

chistu paese mio

chesta città

ca cchiù l’accedino

e cchiù vurria campà.

Almeno int’a nuttata

stanno zitto

chille c’’a vonno male.

S’’a vonno accaparrà

p’’e fatte lloro

pe fa chello ca  vonno

nu dimane

senza pietà

senza ca nisciuno

le pò dì:- nun se po’ fa.

Ccchiù sulo ‘e chesta sera

nun me so’ ntiso maie

ma ‘a casa

‘un tengo voglia ‘e riturnà

aspetto ‘o sole

pecchè sulo cu isso

io pozzo raggiunà

ca ce capimmo

e nun m’allucca

si me ‘nfonn’’e piere

ca senteno ‘o bisogno ‘e riciatà

doppo  ‘e tanta juorne

ca stò luntano a ccà.

Gioacchino Ruocco

Ostia Lido   01.06.2020

Ispirata dal Video di Stabiesi al 100%  sul CORONA VIRUS