Quanno ‘o tiempo ‘nn avasta...

Quanno ‘o tiempo ‘nn avasta

pe te restà vicino

pecchè ‘a fatica è troppa necessaria

me mette ‘int’a na sacca duie madarine

e me n’asco c’’o core cchiù tranquillo

comme a quann’ero piccerillo.

M’’e porte appriesso pe sentirne addore

ch’è ‘a stessa ‘a toia che t’’e mangie sempe

quanno dint’’a jurnate spizzeche

comme a chill’aucellezze

ca ncoppo’a loggia veneno

pe na mullica ‘e pane.

C’addore teneno ! Pare ‘e sta a Surriento

quann’eremo guagliune

currenno a nu ciardino a n’ato.

Pazzianno cu ‘ maruzze, ‘o campanaro

annarianno cumete, a sottomuro

fine a che nun faceva scura na jurnata.

E m’addurmevo c’’o pienziero tuio

pe me scetà c’’o stesso penziero.

Me pare aiere e so passate

ll’anne cchiù belle ‘e chesta vita.

Ne passarranno ancora so’ sicuro

sempe cu tte e senza avè paura.

E quanno torno arreto

pe te vedè guagliona

songo felice ‘e sentere

comme me sbatte ‘o core

quanno me piglie ‘a mano,

quanno me ne puorte

cu tte tantu luntano

c’ ‘o munno nun esiste

cchiù attuorno, nun se sente.

Cu ll’anema nnucente

ancora ‘e nu criature

c’ancora te vo bbene e te dà pace.

Gioacchino Ruocco

Ostia Lido             15/11/2013      ore 6.30

Inserita nella raccola “Poesie a ll’acqua ‘e rose.