Castellammare di Stabia - Vicoli e traverse tra via Via Brin e Via Duilo + 'O refrisco...

‘O refrisco…

‘O refrisco.

so' chelli pparole

ca nun capisco

ca nun m’è ditto maie.

E aggio passato

juorne ‘e nustalgie,

penziere

ca me deveno ‘e turmiente

cchiù amare

c’’o mare

nun puteva cunzulà,

‘a luntananza

nun truvava ‘o tiempo

‘e te venì a truvà.

Quanno sbarie

senza nu mutivo,

quannu nun siente

parole comme ‘o mele

te saglie mmocca

‘o fele

c’arrugginisce ‘o core.

‘E vvote te screvevo:

- Si more, nun tené pietà.

E ll’aria attuorno

se faceva ‘e vierno

mentre ‘o viento

se purtava ‘e ffoglie

tantu luntano

c’’a via restava

comme a nu nastro niro

c’arravugliava ‘o core

senza chianto.

Senza pietà

fuie st’ammore nuosto.

Nun ero io ca fecevo ‘o tuosto.

Ero ‘o tiempo ca nun teneva tiempo

‘e me purtà dda tte

quanno vulevo.

E jire tu

ca nun tenive voglia

‘e me venì a truvà.

Che ce putive fa!
Che ce putevo fa?

Gioacchino Ruocco

Ostia Lido           24/07/2013