Chillu surriso tuio…

Castellammare di Stabia - Verso largo Pace
Foto di  Giuseppe Zingone dal "Libero Ricercatore" 

Quanno me n'esco

‘e notte ‘a dint’’o lietto

pe j’ ‘a fa ‘e cunfiette,

pe nun scetà nisciuno

strisce sti piere comme a na maruzza.

P’’a via so’ sempe sulo

comme a n’anema perduta

na foglia d’autunno

che se n’’a porta ‘o viento.

Ll’ata matina

p’’o vico

comme a nu sisco ‘e serpe

all’impruvviso

se n’ascette ‘o viento

ca m’atrignette dint’a sta cammisa

manco si tenesse sulo chesto.

Cchiù annanzo comme si fosse vierno

sentette ncuollo ‘a freva,

ma nun turnaie arreto.

‘O ssaie comme so’ fatto!

Sentette ncuollo ‘o peso d’’a famiglia

e qualche soldo ca nun è maie ‘e troppo

muvette ‘e passe

e me truvaie cchiù a nnanze.

Schiuppaieno ‘e rrose

quase all’impruvviso

quanno m’arricurdaie chillu surriso tuio

e me scurdaie ‘o vico,

ca s’astrignette

fino a c’’o cielo nun chiagnette

nu paraviso ‘e lacreme cuntente.

Gioacchino Ruocco

Ostia Lido,          10/07/2013