Ve ne site maie jute p’’a campagna ? da "Suspire 'e miezo juorno"

Da sn. Gioacchino, Peppe, Ferdinando,

Annunziatella

Ve ne site maie jute p’’a campagna

piglianna p’‘a via d’’a Nunziatella ?

Quann’eremo guagliune,

specie ‘a dummeneca,

quanta gire ca ce  simme fatte,

Manco si tenevemo nu sfratto

‘e nnove ‘mpunto

‘nnanz’a chiesa ‘a Starza

e doppe se parteva p’’a campagna

p’’o sciummo, p''e bosche, pe Varano,

Scanzane, Mezaprete,

Puzzano, all’acqua d’’a Madonna.

‘A verità nun eremo cuiete.

Jevemo cammenanno tuorno tuorno

pe ce sfugà nu poco d’’o latuorno

ca mamme e pate faceveno ogne juorno.

Pazziavemo, cantavemo

senza ce piglià scuorno

‘e chello ca facevemo p’’a via

appiccianno  o stutanno ‘a fantasia

assiconda d’’o tiempo e d’’o mumento.

‘O cchiù malamente ‘e nuie

era n’anema ‘nnucente

ma ‘miezo ‘o fuia fuia è sempe ‘ stesso

chi resta arreta è chillo ch’è cchiù fesso,

ca primme te sistieme e meglio è.

Quanta ricorde e che malinconia,

mò ca stò luntano e penzo a Peppe,

a ‘Ntonio, a Guido, Rafele, Ferdinando

ca tenevo ‘o penziero a na guaglione

a figlia ‘e donn’Antonio ‘o gravunaro

ca le screviette pure na canzone.

E m’arricorde tutt’’e guagliuncelle,

una ca se facette munacella,

chella ca sunava ‘o pianoforte

e chella ca pigliava e po’ lassave

nu juorno a uno

e ‘o juorno appriesso a n’ato.

Quanta canzone scritte

e maie cantate!

‘O tiempo passa

e i’ sto piglianno ‘a via

‘e tutte sti penziere ca ritorneno

comme si fosse aiere

e me ne vaco ‘e primma matina

ancora pe Varano, ‘a Nunziatella,

dint’’o Cugnulo

all’acqua d’’a Madonna

pe sent’ addore ‘e sfogliatelle ‘e Surrentino,

pe sentì chello che resta ancora

‘e quann’ero guaglione

e pe me fa capace

si stamme ancora a ppane e pane,

cu ll’uoglio ‘e mulignane

o ‘nzogna e alice.

Ogge ca vulesse essere felice

vide che m’arrorde ?

Me mancano ll’amice ?

E che ne saccio

si nisciuno me scrive

e nun me chiammo.

I’ scrivo ancora

pecchè me sento vivo,

pecchè so’ vivo

e tengo ‘o core tanto.

‘E canzone ca scrivo ogge

m’’e sone e canto

e torno ‘e vvote ‘ncopp’a Putiella,

sotto Puzzano

p’’a via d’’o Castiello

tenenne pe mmane sti penziere

ca nun me danno ora

comme si fosse ancora guagliunciello

e aggio bisogno ‘e lloro

p’avè qualcuno pe na cumpagnia.

08/06/2012   Ostia Lido

Inserita nella raccolta  “Suspire ‘e miezojuorno”
autore: Gioacchino Ruocco
pubblicata da: http://ruoccotribu.blogspot.com/