E’ vierno e male tiempo fa

E’ vierno e male tiempo fa.

Fore ‘o terrazzo nun ce se po’ stà,

ma tu’o stesso staie a curà ‘e piantine

vaie levanne ‘e fronne ca so’ secche.

Miette cchiù riparata ‘o putrusino

E smuove ‘a terra che s’è fatta tosta.

Arracque chelle ca nun pigliano

maie acqua quanno chiove,

‘miette dint’a n’angolo ‘o vasenicola

addò ‘o sole ‘o scarfa e nun l’abbruce,

addò ‘o viento nun sconceche cchiù ‘e ffoglie

‘e chellu nnecessario p’’o scetà,

ca pure ‘e pianta dormeno

quanno s’è fatto sera

e int’’a matina sbocciano

spannenno attuorno addore

ca quanno ‘e riesce a sentere

te metteno n’ardore ncuollo

ca sceta ‘a fantasia

ca qualche verso ammolla.

Quanno te veco ‘e movere

dint’a chell’aria fredda

me vene ‘o gelo ncuollo

ca te tenesse astrenta astrenta

pe te scarfà nu poco.

E quanno gire ll’angolo

te vengo appriesse ancora c’’o penziero

comme a iere ca te venette a scorgere

ca ‘un te vedevo cchiù

pe sta cchiù tranquillo

mentre ‘o viento te scumbinave

‘e capille che t’ire fatte appena.

E ogne tanto t’aizava ‘a vesta

ca cchiù ‘e na vota

s’aggrappava a testa ‘e aloe

comme a uno c’allungava ‘e mmane

mentre a suttana, femmena e liggera,

accummigliava ‘o riesto cchiù pe sfizio

mentre ‘a jurnata ca pareva storta

steve piglianna a via ‘e s’accuncià

c’’o sole ca cchiù scemo nun puteva

pazziava  ncielo cu ‘e nuvele ‘e passaggio

lascianno qualche gocce cca cadeva.

deritta ncopp’a loggia e te bagnava.

Gioacchino Ruocco

Ostia Lido         17/04/2013

Inserita nella raccolta “Traduzioni dal greco”