Scusate Don Rafè,

che v'è succieso ?

Aggio saputo ca 'mmiez'a Villa 

nun ce state cchiù ?

M’hanno ditto

c’'o brunzo s'è ammalato

e hanno purtato ‘o busto

a riparà.

Sperammo ca sta vota

fanno ‘o servizio bbuono !

Si po’ è nu sfizio pe ce guaragnà

se vede c’’o munno  'un è cagnato.

Che ce vuleva ?

Nu poco ‘e stagno ‘e cchiù

ch’era cchià ttuosto ‘o brunzo.

Io m’’o sentevo

ca n’ombra ‘e friddo me truvavo ‘ncuollo

e starnutevo

quanno nisciuno me vedeva

pe nun fa fà ‘e nummere

a chille c''o senteva.

Luigi. fatto ‘e marmo nun 'o sente

‘o friddo ca sent’io.

Cu ‘a pace ‘e Ddio

ognuno penza ‘a soia,

ma ncoppo a chistu blocco

io proprio nun ce stongo a genio.

Stongo cu e spalle ‘o mare

addò io me jettavo

spisso cu tutte ‘e panne

o ‘ncristo annure…

Teneve paura

sule d’’e guardie

ca stevo sempe a sfottere

ca manco ’e figlie lloro

sapevano educà.

Mò chi ce ‘o ddice a chiste

ch’e vvote a me me guardano

comme a nu cammirriste ?

Gioacchino Ruocco

17/09/019