Dint’a stu vico ca nun sponte maje
s’affaccia ‘o sole quase tutt’’e juorne
pe nun passà nu guaio ‘o vico appriesso
neppure nu suspiro ‘e ll’ata ggente.
Ll’uneca cosa ca se sente sempe
è addore d’’o cafè ogne mumento.
Forse se piega accussì ‘o nervuso
c’acchiappa a chi ne fa uso abbastanza,
nu male ‘e capa o nu delore ‘e panza.
Guarda che lenza ‘e sole int’a stu vico
ca comme a na lacerta m’’o gudesso.
Chi ce sta mò nun l’aggio cchiù saputo.
Sicuramente nisciuno cchiù ‘e na vota.
Avesse ducient’anne ‘o nonno mie.
Na zia forse ca se spusaje a chillo
ca faceva ‘o barbiere ‘e Peppe ‘o pazzo
A ppriesso a don Antonio ‘o salumiere.
Nun m’arricordo ‘a chiazza, ma che vulite
songo tant’anne ca nun ce passo cchiù.
Io me ne jette ‘e casa abbascio ‘o gas.
Vicino ‘o palazzone ‘e ‘Ndracchinella.
Passe cchiù ggente ‘a ccà cu ‘e piere nnanze
ca chille ca vanno a sparterse qualcosa.
Mo m’allicordo se chiammava Rosa
chella guagliona ch’era vicina ‘e casa
E ‘o juorno ca me dette ‘o primmo vaso
cu ‘a scusa ca lasciavemo ‘o palazzo.
Esse me dette nu ricordo suio
ca si me torno a mmente esco pazzo.
Gioacchino Ruocco
Ostia lido 2015/11/22
Inserita nella raccolta “Ce steva na vota…”
Nessun commento:
Posta un commento