Quanno sona ‘a sirena
‘o mare fa chiante e penziere
cercanno ‘e capì
addò se ne va
si’a fatica che resta.
N’hanno fatto nu piezzo
e n’ato ‘o farranno
a Trieste, tanto luntano.
Ma che festa po’ esse
chella ‘e ogge
si ancora ‘o rilorgio sta fermo
a ‘o tiempo ch’è stato ?
Hammo fatto ‘e cchiù belle
c’ancora gireno ‘o munno.
N’hammo fatto pe jì pure a funno
cchiù a futo d’’o futo
c’ancora ce stà.
N’amma fatte e che n’amma fatte
ma ‘o patto c’’o mare
ancora ‘un ce stà
e ogne vota ca sona ‘a sirema
rischiammo ‘e restà
cu ‘e bracce cunzerte
cu stu mare c’aspetta
pe fà festa cu nuie.
Quanno sunava ‘a sirena
‘a ggente curreva a vedè
e chiagneva e redeva
ma mò me vene paura
ca chello ca resta
s’accatta ‘o pezzaro
pe nu piezzo ‘e sapone
e nuie restanno
comme già è succieso
cu ‘e mmane mmano
aspettanno, aspettanno, aspettanno
Gioacchino Ruocco
Ostia Lido 01.02.2018
Nessun commento:
Posta un commento